Разам з усім светам Беларусь адзначае Дзень роднай мовы

Дзень роднай мовы адзначаюць сёння ва ўсім свеце. Міжнародным гэта свята стала 21 год таму. Паводле звестак ЮНЕСКА, зараз існуе каля 6 тысяч розных моў. Культурную разнастайнасць захоўваюць і ў нашай краіне. Жывую і мілагучную матчыну мову вывучаюць з дзяцінства. Ствараюцца беларускамоўныя дзіцячыя садкі і групы. З'яўляюцца клубы для дарослых. Дарэчы, беларускай мовай цікавяцца і замежнікі. 

Падрабязней - Алена Вітко.
Вось так, з усмешкі і прывітання,  пачынаецца кожны дзень ў сталічных яслях-садзе № 534. І дзеці, і выхавальніцы тут размаўляюць выключна на роднай мове. Матэматыка, пісьмо, чытанне, маляванне, тэатральны гурток - усе заняткі праходзяць па-беларуску. 
Дзень роднай мовы - гэта добрая нагода, каб успомніць каларытныя і самабытныя беларускія словы. Напрыклад, імбрык, хмарачос і філіжанка. Дарэчы, мы праверылі, ці ведаюць іх значэнне мінчане.

Беларуская мова - з рознымі акцэнтамі

Хасе Піньера такія пытанні не бянтэжаць. Венесуэлец сем гадоў таму пераехаў у Мінск, каб выкладаць іспанскую мову. І нечакана для сябе  захапіўся беларускай. Мовай і дзяўчынай. Яго каханая заўсёды размаўляе на роднай. 
Дзякуючы запалу і вялікаму жаданню пазнаваць нашы традыцыі, Хасэ арганізаваў моўныя курсы – для тых, хто прыехаў у нашу краіну з-за мяжы. І зараз  кожную нядзелю ў сталічнай бібліятэцы імя Пушкіна  беларуская мова гучыць з рознымі акцэнтамі. 

Беларускамоўная прэм'ера ў Мінскім планетарыі 

Да Дня роднай мовы - прэм'ерны паказ паўнакупальнага фільма па-беларуску падрыхтаваў сталічны планетарый. Кінастужка «Далёка ад Сонца» знаёміць з фантастычнай гісторыяй дзяўчынкі Селесты, якая хоча даследаваць Сусвет. У афішы фільм застанецца на два гады і будзе дэманстравацца толькі на беларускай мове.