"Скрыпкі з віскам гарэлі, арфы плоць разразалі". Так, у сваім стылі легендарныя Rammstein пракаментавалі супрацоўніцтва з Белтэлерадыёкампаніяй. "Пад грыфам “сакрэтна" - новы праект, а дакладней, сёмы студыйны альбом металістаў. Здзівілі прыхільнікаў фота ў сацсетках з гітарыстам Rammstein і геалакацыяй Мінск. Так, гэта сюрпрыз для фан-супольнасці: культавыя музыканты ў беларускай сталіцы.
Новы зборнік хітоў Rammstein запісваюць пры ўдзеле сімфанічнага аркестра і акадэмічнага хору Белтэлерадыёкампаніі на базе Дома радыё. Саюз нашых калектываў і легендарных рокераў адбыўся дзякуючы нямецкаму імпрэсарыа і дырыжору Вільгельму Кайтэлю. У яго біяграфіі лепшыя пляцоўкі свету і супрацоўніцтва з сусветнымі зоркамі. Пакуль падрабязнасці сумеснай справы трымаюцца ў сакрэце, але ў нас, вядома, ёсць эксклюзіўны каментарый.
Вільгельм Кайтэль, піяніст, дырыжор, імпрэсарыа (Германія): "Калі мне патэлефанаваў аранжыроўшчык Rammstein і распавёў, што група хоча запісаць новы дыск з прыцягненнем беларускага аркестра, мая першая ідэя была - зрабіць гэта з аркестрам і хорам Белтэлерадыёкампаніі. Я шмат супрацоўнічаў з гэтымі калектывамі ў мінулым і выдатна знаёмы са студыяй, з яе патэнцыялам, таму адразу стала зразумела, з кім і дзе мы будзем гэта рабіць. Самы вялікі плюс: гэта калектывы, якія шчыра хочуць працаваць і ставяцца ўважліва да любога праекта. Няма неабходнасці марнаваць шмат энергіі і сіл, каб яны ігралі добра і матывавана. Яны зацікаўленыя ў тым, што яны робяць. Яны высокапрафесійныя ў тым, як яны іграюць. Таму з імі лёгка прыйсці да сумеснага жаданага выніку".
