Больш за 50 навуковых эксперыментаў, а таксама праца з расійскім, японскім і амерыканскім касмічнымі грузавымі караблямі. 17 лістапада з касмадрома Байканур запланаваны старт касмічнага карабля "Саюз-МС-03". Камандзір экіпажа, герой Расіі і наш суайчыннік - Алег Навіцкі. Разам з ім у космас адпраўляюцца астранаўты з Францыі і ЗША. Сёння ў Зорным гарадку адбыліся ўрачыстыя праводзіны экіпажа МКС 50/51 на Байканур.
Шчаслівага шляху касманаўтам пажадала і Дар'я Белавусава-Пятроўская. Аб палёце чалавека ў космас у СССР сур'ёзна загаварылі ў канцы 50-х. Савецкі навуковец і канструктар Сяргей Каралёў прапанаваў адбіраць кандыдатаў сярод лётчыкаў знішчальнай авіяцыі. З амаль 3,5 тысячы прэтэндэнтаў конкурс прайшлі толькі 20 чалавек. Але ім неабходна было месца для трэніровак. Так у Зорным гарадку з'явіўся Цэнтр падрыхтоўкі касманаўтаў.
За гэтыя гады ў цэнтры прайшлі падрыхтоўку больш за тысячу касманаўтаў з розных краін. З іх 3 беларусы. Пётр Клімук, Уладзімір Кавалёнак і Алег Навіцкі - менавіта ён стаў камандзірам асноўнага экіпажа МКС 50/51, які праз некалькі тыдняў адпраўляецца ў космас. Сёння ў Зорным гарадку касманаўтам наладзілі ўрачыстыя праводзіны - такая традыцыя. Агульная фатаграфія на памяць і невялікае інтэрв'ю журналістам - час распісаны па хвілінах.
Для Алега Навіцкага гэта ўжо другі палёт у космас. Па традыцыі ў добры шлях яго праводзіць уся сям'я, дзве дачкі і жонка. Дарэчы, пакуль муж у космасе, яна на Зямлі вядзе "дзённік жонкі касманаўта".
Пасля прыбыцця на касмадром Байканур асноўны экіпаж МКС 50/51 пад камандаваннем Алега Навіцкага чакае рэжым абсервацыі. Г.з. каманда зможа мець зносіны толькі з людзьмі, якія прайшлі спецыяльнае медыцынскае абследаванне. Бо нават невялікі насмарк можа прывесці да адмены палёту. Старт касмічнага карабля МС-03 запланаваны на 17 лістапада.
