У пытанні з Грушаўскім паркам у сталіцы пастаўленая кропка

Важна не толькі жыць у камфортных умовах (каб дах не працякаў і тынк не сыпаўся), але і, выходзячы ўжо на вуліцу, мець магчымасць недалёка ад дома прагуляцца ўсёй сям'ёй, пракаціцца на веласіпедзе. Але часам знайсці зялёны аазіс няпроста. А часам і абараніць яго. Як у сітуацыі з Грушаўскім скверам.

Нагадаем, тэма доўгі час не давала супакою жыхарам Маскоўскага раёна. Мінчане былі супраць будаўніцтва новага жылога комплексу. Бо з-за ўшчыльнення прыйшлося б паменшыць паркавую тэрыторыю і высекчы дрэвы. У сітуацыю ўмяшаўся Прэзідэнт. 

Жыхароў сталіцы пачулі. На тыдні ў пытанні паставілі кропку. Па даручэнні Кіраўніка дзяржавы старшыня Савета Рэспублікі Наталля Качанава асабіста вывучыла і ацаніла ўсе рызыкі, сустрэлася з мясцовымі жыхарамі, адміністрацыяй раёна і прадстаўнікамі кампаніі-забудоўшчыка. Выслухаўшы ўсе аргументы бакоў, вырашана: забудова і добраўпарадкаванне будуць весціся так, каб сквер не пацярпеў.