У Беларусь з іншага кантынента. У сталічны тэхналагічны універсітэт па абмен вопытам прыехалі студэнты з Кітая. 20 чалавек два тыдні будуць праходзіць практыку на факультэце прынттэхналогій. Лекцыі выходзяць за межы аўдыторый. Экскурсіі ў лясніцтвах, выдавецтвах і музеях.
Наталля Кезік далучылася да групы гасцей з Паднябеснай. Паўтысячы фотаздымкаў з Беларусі. Чэнь Яцын за тыдзень у сталіцы ўжо сабрала даволі разнастайны архіў на памяць. Больш за ўсё студэнтцы Шанхайскага каледжа падабаюцца вандроўкі па беларускіх лясах і запаведніках. На гэты раз спыніліся ў Негарэльскім доследным лясніцтве. Гасцей уразілі вялізныя беларускія дрэвы, прыгожыя расліны і нават камяні.
Наступным прыпынкам стаў Нясвіжскі замак. Праходзячы па княжацкіх пакоях, кітайскія госці не адразу зразумелі, што тут адначасова жылі некалькі пакаленняў адной сям'і. Згодна з кітайскай гісторыяй, у іх замках жыў заўсёды толькі імператар. Дарэчы, каб атрымаць магчымасць прыляцець у Беларусь, студэнтам з-за мяжы таксама неабходна было прайсці сур'ёзны кастынг на радзіме.
Па абмене кітайскія студэнты ў тэхналагічны ўніверсітэт прыязджаюць другі год запар. У праграме практычныя заняткі ва ўніверсітэце і на друкарскіх прадпрыемствах.
Для адпачынку пешыя прагулкі па экалагічных сцежках, экскурсіі ў Белавежскую пушчу, Бярэзінскі запаведнік. Такія звыклыя для нас і вельмі экзатычныя аб'екты для замежных гасцей.
У той жа час Шанхайскі паліграфічны каледж таксама прымае на вучобу і беларускіх студэнтаў. Два тыдні ў іх таксама ёсць магчымасць вывучыць друкарскія тэхналогіі ў Кітаі. А затым, магчыма, прадоўжыць навучанне ў Шанхайскім каледжы яшчэ адзін год.
Наперадзе ў гасцей з Кітая даволі насычаная праграма. Акрамя сучасных выдавецтваў, днямі ў Полацку азнаёмяцца з гісторыяй кнігадрукавання. Таксама наведаюць сталічныя тэатры і цырк. А ў нядзелю адправяцца на радзіму з самымі прыемнымі ўспамінамі пра Беларусь.
