Праверыць формулы ў дзеянні і нават адправіцца ў віртуальную касмічную экспедыцыю. У сталіцы ўсё больш цэнтраў займальных навук. Даведацца больш пра законы фізікі дапамагаюць сучасныя тэхналогіі і творчыя падыходы. Новыя адкрыцці для сябе зрабіў і наш карэспандэнт.
Здзейсніць вандроўку па Старажытным Рыме, разгледзець у дэталях Сікстынскую капэлу або адправіцца ў экспедыцыю па целе чалавека. Міхаіл Вайцяхоўскі пераўтварыў гэты невялікі пакой у партал, які пераносіць чалавека ў любы пункт свету і часу.
Для пагружэння ў віртуальныя прасторы неабходна прымерыць высокатэхналагічны «акваланг». Шлем і спецыяльныя датчыкі ствараюць гульнявое поле, дзе карыстальнік аказваецца ў самым кругавароце падзей.
Праверыць жа магчымасці свайго цела прапаноўваюць у сталічным Музеі займальных навук. Тэрыторыя інтэрактыўнай лабараторыі падзелена на тэматычныя зоны: біялогію, хімію, фізіку і аптычныя ілюзіі. Тут жа можна паспрабаваць зрабіць новыя адкрыцці і правесці ўласныя эксперыменты.
Вымераць хуткасць гуку, супрацьстаяць цэнтрабежнай сіле і нават паменшыцца або павялічыцца памерамі. Навуковыя формулы тут ажываюць з дапамогай звыш як паўтары сотні экспанатаў.
Сабраць вагі з зубачыстак або змайстраваць SOS-перадатчык з веласіпеду і старога радыё – вырашаць творчыя задачы прапаноўваюць на занятках па навуковым фрыстайле. Тут дакладныя навукі дапаўняе творчы падыход. Напрыклад, толькі двума аркушамі паперы і лазернай указкай можна памераць вышыню столі. Усё зводзіцца да школьнай задачы: трэба знайсці адзін бок роўнастаронняга прамавугольнага трохвугольніка.
А ўжо ў пачатку снежня на вуліцах сталіцы будзе курсіраваць мабільная акеанаграфічная лабараторыя. Падводныя экскурсіі па акеанах усяго свету для маленькіх першаадкрывальнікаў тут будуць ладзіць віртуальныя гіды і сапраўдныя жыхары глыбінь.
