Як вынік - з Мінска ў Рудзенск за 50 хвілін. Сёння ў сталіцы прайшла цырымонія адкрыцця руху цягнікоў гарадскіх ліній. Сучасныя электрычкі будуць хадзіць з хуткасцю 140 кіламетраў за гадзіну. Сёння са станцыі Лошыца да станцыі Мінск-Пасажырскі праехаліся і першыя пасажыры - Прэм'ер-міністр Беларусі Міхаіл Мясніковіч, прадстаўнікі мясцовых Саветаў дэпутатаў і Беларускай чыгункі.
У новым цягніку пракацілася і Улада Карніцкая.
140 кіламетраў за гадзіну, 11 прыпынкаў і 4 вагоны. Калі будзе патрэба, вагонаў будзе больш. І ўсё гэта новы маршрут Мінск - Рудзенск, першы цягнік адправіўся сёння.
На маршруце Мінск - Рудзенск будуць курсіраваць дзевяць пар цягнікоў гарадскіх ліній. Гэтую адлегласць хуткасныя электрычкі пераадоляць усяго за 50 хвілін. А спецыяльна для ашчадных, паабяцалі ў Мінскім аддзяленні чыгункі, на гэтым участку будуць ажыццяўляць рэгулярныя рэйсы 25 пар цягнікоў рэгіянальных ліній эканамкласа.
Ацаніць зручнасць і хуткасць новага маршруту ў святочны дзень вырашыў асабіста прэм'ер-міністр краіны. Міхаіл Мясніковіч - у ліку першых пасажыраў.
З Рудзенска першыя рэйсы цягнікоў гарадскіх ліній прызначаныя на 20 чэрвеня. У сталіцу яны будуць прыбываць у 7:10 і 7:45, што вельмі зручна для тых, хто штодня ездзіць у Мінск на працу ці вучобу.
Будаўніцтва новага маршруту працягвалася ўсяго адзін год. За гэты кароткі час тут на чыгунцы правялі маштабную мадэрнізацыю. Абнавілі ўсе станцыі і прыпыначныя пункты на маршруце.
На канцавой станцыі прэм'ер-міністр наведаў абноўленую залу чакання чыгуначнага вакзала. За некалькі хвілін да гэтага сваімі ўражаннямі з намі дзяліліся звычайныя пасажыры.
Цяпер тут у пасажыраў ёсць магчымасць камфортна не толькі правесці час да адпраўлення цягніка, але і атрымаць амаль усю неабходную інфармацыю пра паездку: пачынаючы ад раскладу цягнікоў, аўтобусаў і самалётаў і сканчаючы паслугамі гасцініц і нават даведнікам па славутасцях беларускіх гарадоў. Акцэнтам кампазіцыі залы стаў размешчаны ў яе цэнтры сучасны інфацэнтр.
Міхаіл Мясніковіч, Прэм'ер-міністр Беларусі:
Мы сфармулявалі цэлы шэраг даручэнняў на далейшае развіццё. Мы мяркуем, што сёння яшчэ не досыць эфектыўна выкарыстоўваюцца да тэрыторыі побач з чыгункай, і на працягу 2014 года Мінскі гарвыканкам сумесна з рэспубліканскімі службамі распрацуе свайго роду праект дэталёвага планавання.
Усяго ў Мінску з моманту адкрыцця руху цягнікоў гарадскіх ліній яны перавезлі больш за 3 мільёны беларусаў. Толькі за дзевяць месяцаў гэтага года - амаль 1,5 мільёна.
Ужо праз два гады, згодна з планам, са сталіцы пасажыраў прамым рэйсам цягнік зможа даставіць у Смалявічы, а да 2020, як плануюць, будзе адкрыты яшчэ і маршрут Мінск - Дзяржынск.
