Паўгода без электрычнасці. У Слонімскім раёне 7 мехмайстэрань з-за вялізных даўгоў вымушаны сачыць за сонцам і рамантаваць трактары і сеялкі на вуліцы пакуль светла, а іх уласныя такарныя станкі ператварыліся ў музейныя экспанаты. Якой для гэтых СВК стане пасяўная кампанія, наколькі рэальна ўсё ж выплаціць мільярдныя запазычанасці? Падрабязнасці ў рэпартажы Дзмітрыя Смірнова.
У гэтай майстэрні зараз даэлектрычная эпоха. Нібы Эдысан і Тэсла яшчэ нічога не вынайшлі. На ўключальнік тут ужо паўгода не звяртаюць увагі. Доўг перад мясцовымі энергасеткамі неверагодны - больш за 4 мільярды рублёў. І зараз у самы разгар падрыхтоўкі да пасяўной гэта падобна катастрофе.
Аляксандр Добрук, начальнік аддзела Камітэта дзяржкантролю Беларусі па Гродзенскай вобласці: "Адсутнасць электрычнасці, вядома, прывядзе да зацягвання тэрмінаў рамонту тэхнікі, негатыўна адаб'ецца і на якасці рамонту і, адпаведна, на якасці палявых работ. На сённяшні дзень гаспадаркі, у якіх адсутнічае электрычнасць, адстаюць ад графіка".
Гатоўнасць тэхнікі да палявога сезона - 50-60 % ад запланаваных 80. У механізатараў на рахунку кожная светлая хвіліна.
Рабочы дзень у гэтых майстэрнях доўжыцца столькі ж, колькі свеціць сонца. Далей можна заставацца хіба што з запаленай свечкай. Электрычнасці тут няма ўжо паўгода.
Пакуль не надта холадна, рамонт ідзе за межамі майстэрань.
Уся звыклая тэхніка, з дапамогай якой точаць, зварваюць і паднімаюць, тут стаіць у якасці экспанатаў. Нават дробныя дэталі, якія звычайна робяць самі работнікі, прыходзіцца заказваць. Усё гэта дадатковыя выдаткі. Так, СВК "Дружба-Агра", каб закончыць рамонт тэхнікі, патрэбны яшчэ 600 мільёнаў рублёў.
У даўгах, дарэчы, ходзяць не ўсе. У тым жа Слонімскім раёне дырэктар іншага сельскагаспадарчага кааператыва гатовы вывесці тэхніку ў поле 1 сакавіка.
Агульная запазычанасць сямі слонімскіх майстэрань перавысіла 30 мільярдаў рублёў. Улічваючы факт, што за месяц гэтыя СВК зарабляюць кожны каля паўтара мільярда, а яшчэ выплачваць зарплату, крэдытныя працэнты, купіць паліва і ўгнаенні - электрычнасць у прыярытэтным спісе не застаецца. Хутчэй за ўсё, да продажу будучага ўраджаю.
