На адзін рэйс будуць вылучаць некалькі білетаў па паніжаных цэнах. Такое новаўвядзенне з'явіцца пасля дапрацоўкі ў глабальнай сістэме браніравання білетаў, праз якую працуе нацыянальны перавозчык. Аб гэтым сёння падчас анлайн-канферэнцыі на сайце Белтэлерадыёкампаніі паведаміў гендырэктар Белавія Анатоль Гусараў. Ён таксама падкрэсліў, што колькасць пасажыраў, якія пралятаюць праз нашу краіну, пастаянна расце.
Анатоль Гусараў, генеральны дырэктар авіякампаніі "Белавія": "Пасажырапаток узрастае штогод у сярэднім на 20%. І я спадзяюся, што сёлета мы наблізімся да лічбы ў 2 млн. чалавек. Сёння ў нас 1,8 млн., але за два месяцы мы павінны наблізіцца ўшчыльную і перасягнуць гэтую мяжу".
Таксама па просьбе інтэрнэт-карыстальнікаў адной з груп у сацсетках нацыянальны авіяперавозчык перадасць беларусу, які жыве ў Дубаі, марожанае "Каштан", па якім ён вельмі сумуе. Анатоль Гусараў адзначыў, што пакуль няма прамога рэйса Мінск - Дубай. Дапаможа партнёр - авіякампанія "Этыхад". Відэаверсію анлайн-канферэнцыі глядзіце на сайце tvr.by.
