Вось ужо сапраўды: гэта трэба не мёртвым, гэта трэба жывым. Як і распрацоўка, якая дазваляе без скальпеля атрымліваць надзею на вылячэнне. У РНПЦ анкалогіі з'явіліся 2 апараты, якія дазваляюць абясшкодзіць пухліны з дапамогай гама-промняў. Адна з машын дапамагае справіцца з хваробай (да пэўнай стадыі) у любой частцы цела, другая - для галаўнога мозгу. Унікальнасць працэдуры ў тым, што пасля яе пацыент можа адразу паехаць дамоў, хоць бы таму што аперацыя праходзіць пад мясцовым наркозам. Працягне Юлія Грызунт.
Бадай, адзінае падабенства з сапраўднай аперацыяй тут у тым, што за працэдурай сочыць цэлая каманда з 5 чалавек. 2 медсястры, урач і (замест хірургаў) 2 інжынеры. Пасля такога ўмяшання шрамаў не застаецца. Спецыяльныя лазеры дазваляюць знішчыць пухліны ў любым месцы цела.
Ягор Цітовіч, начальнік аддзела РНПЦ анкалогіі і медыцынскай радыялогіі імя М. М. Аляксандрава: "Паколькі гэтае абсталяванне з высокім класам небяспекі, на кожны рух і на кожны паказчык, на кожны параметр ёсць дзве блакіроўкі незалежныя. Такім чынам, цалкам выключаная магчымасць няправільнага апраменьвання і падачы няправільных параметраў".
Больш за тое, тонкія промні дазваляюць кропкава біць толькі па зададзенай мэце. На здаровую тканку радыяцыя не распаўсюджваецца. Працэдура праводзіцца да 30 разоў для аднаго чалавека. Анатоль Рымашэўскі прыехаў ужо 27-ы. Паводле слоў урачоў, калі б не новае абсталяванне, пасля аперацыі Анатоль бы мог на ўсё жыццё застацца інвалідам.
Павел Дзямешка, загадчык аддзела РНПЦ анкалогіі і медыцынскай радыялогіі імя М. М. Аляксандрава: "Усяго ў свеце ўсталявана каля 3000 такіх апаратаў, але, напрыклад, у РФ такіх усяго 4. Дадзенае абсталяванне з'яўляецца даволі ўнікальным. І вопыт гэтага абсталявання налічвае некалькі дзясяткаў гадоў, у нас апошняя мадыфікацыя апарата. І вопыт паказвае, што гэтае лячэнне эфектыўнае".
Такая ў двукоссях аперацыя займае паўдня. І падчас самай складанай яе часткі пацыент знаходзіцца ў сваёй палаце. Бо спачатку машыну трэба індывідуальна запраграмаваць. Для таго каб асвоіць тэхналогію, першыя ўмяшанні праходзілі сумесна з дактарамі з Амерыкі і Еўропы. Сёння працэс адпрацаваны ўжо да аўтаматызму, працэдуру прайшлі каля паўсотні пацыентаў.
Апраменьванне доўжыцца ад 40 хвілін да 4 гадзін, у залежнасці ад складанасці і колькасці ўтварэнняў. Менавіта столькі часу дастаткова, каб выклікаць у пухліны незваротныя змяненні. Таму такая працэдура праводзіцца ўсяго адзін раз.
Усё пад мясцовым наркозам, а значыць, адразу пасля пацыент можа ехаць дамоў. Кантрольнае абследаванне - праз месяц. Але, нягледзячы на станоўчыя вынікі, па-ранейшаму кожны можа сам выбраць паміж гама-промнем і скальпелем.
