Як паказвае практыка папярэдніх гарачых ліній, па-ранейшаму на першым месцы праблемы ў ЖКГ. Суботнія званкі раздаюцца менавіта з такімі зваротамі. Часцяком гэтыя пытанні маглі быць вырашаныя без зваротаў, часам жа, каб навесці парадак, прыходзіцца падключаць і Камітэт дзяржкантролю. Як здарылася ў Буда-Кашалёўскім раёне Гомельскай вобласці. Падрабязнасці ў нашага карэспандэнта Вольгі Халадовіч.
Усяго два дзясяткі хат і трыццаць жыхароў. Усю вёску Якімаўка пешкі можна абысці за 20 хвілін. А вось для камунальнікаў гэтая адлегласць апынулася непераадольнай. Некалькі гадоў з вёскі не вывозілі смецце.
Забіраць мяшкі сталі толькі некалькі месяцаў таму. А вось па дакументах - смецце з вёскі вывозілі рэгулярна. На падставе дамовы, якую падпісалі мясцовыя жыхары.
Тры гады мясцовыя камунальнікі забывалі забіраць смецце ў жыхароў гэтай вёскі. Але не забывалі прысылаць рахункі аб аплаце. І вяскоўцы фактычна плацілі за паслугу, якой не атрымлівалі.
Смецце з падворкаў стала знікаць з зайздроснай рэгулярнасцю толькі пасля таго, як мясцовыя жыхары звярнуліся на прамую тэлефонную лінію. А калі да праблемы падключыліся спецыялісты дзяржкантролю, камунальнікам нават прыйшлося зрабіць пераразлік.
Больш за год абівалі парогі кабінетаў мясцовай улады і жыхары вёскі Івальск. Сметнік побач з іх хатамі рос літаральна на вачах. І толькі пасля тэлефоннай гутаркі напроста тут навялі парадак.
Паводле слоў мясцовых жыхароў, сёння яны яшчэ раз упэўніліся, што ўсе праблемы вырашальныя, было б жаданне. Якое часцяком з'яўляецца ў мясцовай улады толькі пасля звароту людзей на прамую тэлефонную лінію.
