Паабедаць са сваім гадаванцам не толькі дома зараз магчыма і ў Мінску. У адным са сталічных кафэ афіцыйна адчынілі дзверы для наведвальнікаў з сабакамі. Акрамя таго, з нядаўніх пор гадаванца пры наяўнасці намордніка, ланцужка і аднаразовых пакетаў для выканання чысціні можна ўзяць з сабою і нават на працу. На дзвярах аднаго з беларускіх рэкламных агенцтваў з'явіўся надпіс: DOG FRIENDLY. Але гэта, хутчэй, выключэнне, чым правіла. Пакуль жа актуальныя простыя пытанні для аматараў жывёл - дзе іх выгульваць, для астатніх, прабачце, як не ўляпацца. Юлія Грызунт спрабавала разабрацца ў сітуацыі.
Белка, Север і Лакі, можна сказаць, сябры дзяцінства. Дзякуючы ім пазнаёміліся і гаспадары, якія сутыкнуліся з агульнай праблемай - выгульваць гадаванцаў няма дзе, суседзі незадаволеныя, калі чацвераногія гуляюць прама ў двары, а спецыяльнае месца для выгулу да нядаўніх пор больш нагадвала іржавую клетку паміж дамамі.
Найбліжэйшая пляцоўка, не лічачы гэтай, знаходзіцца прыкладна за тры кіламетры, што, напрыклад, для Белкі - непераадольная адлегласць. Асаблівасць пароды - сабака далёка не Хаціка, і як толькі аказваецца на вуліцы - можа адразу ўцячы, а вось дарогу дахаты яна знойдзе ўжо наўрад ці.
Вольга Заічкава, уладальнік сабакі: "Калі было будаўніцтва вось гэтага дома, гэтую пляцоўку знеслі, яна не функцыянавала даволі доўга, і гэта была сапраўды праблема. На той момант мы выдатна зразумелі, як мы будзем жыць, калі пляцоўкі гэтай не будзе".
Такіх "сабачых панадворкаў" па сталіцы 49, гэта значыць - некалькі ў кожным раёне. Прычым, каля дамоў іх не можа быць апрыёры, паводле правілаў, яны павінны знаходзіцца за 40 метраў ад жылых будынкаў.
У адваротным выпадку - штраф у памеры ад 1 да 15 базавых велічынь. Таксама штраф прадугледжаны для гаспадароў, якія выгульваюць сабак без ланцужка і намордніка. Паслабленне, якое датычыцца наморднікаў, дапушчаецца для шчанюкоў да трох месяцаў і дэкаратыўных сабак, вышынёй у карку менш за 25 сантыметраў. Але ў цэлым складана напісаць закон пад усіх жывёлін. Час і месца для выгулу, у першую чаргу, павінна залежаць ад характару гадаванца. Ні для каго не сакрэт - ад чаго сабака бывае куслівай.
Як раз для выхаваных гадаванцаў у Мінску з'явілася першае кафэ, куды афіцыйна можна прыйсці разам са сваім чацвераногім сябрам, акрамя таго, тут яму нальюць вады і прапануюць міску з кормам.
Наталля Жукава, намеснік міністра аховы здароўя - галоўны Дзяржаўны санітарны ўрач Беларусі: "Такога патрабавання, як адсутнасць або недапушчэнне жывёлін, не было ні ў адных санітарных правілах, якія дзейнічаюць на тэрыторыі РБ, больш за тое, у нас у Мінску існавалі і існуюць рэстараны, дзе ў зале прысутнічаюць птушкі, жывёліны і з'яўляюцца часткай інтэр'еру".
Вядома, паводле правілаў, ні наведвальнікам кафэ, ні тым больш жывёлінам, нельга захадзіць на кухню. А ці можна знаходзіцца ў зале з гадаванцамі, вырашае толькі гаспадар установы.
Дарэчы, у Еўропе сёння больш складана знайсці кафэ, куды нельга захадзіць з чацвераногімі. У Беларусі пакуль што перад тым як выбраць установу, трэба загадзя патэлефанаваць і даведацца, ці пусцяць туды з сабакам.
У планах на гэты год яшчэ як мінімум 10 устаноў, куды можна будзе прыйсці са сваім гадаванцам, наступны крок - сабачы офіс. Наклейка DOG FRIENDLY ужо з'явілася на дзвярах аднаго з беларускіх рэкламных агенцтваў.
У нашай краіне ўжо год дзейнічае супольнасць аматараў сабак, якія і ўручылі кафэ запаветную наклейку. У планах - летні DOG FRIENDLY-кінатэатр, спецыяльныя ўрны з пакетамі для ўборкі ў кожным раёне і адукацыйныя ўрокі па доглядзе сабак для дзяцей.
Хутка ў Беларусі з'явіцца партал, дзе можна будзе знайсці ўсе "сабачыя" кафэ, месцы для выгулу, пляцоўкі і акцыі, прысвечаныя чацвераногім сябрам.
