Сітуацыі, у якую трапілі жыхары аднаго з дамоў Брэста, не пазайздросціш. Сцены трашчаць па швах, разбураюцца аконныя адкосы. Жыхары адразу некалькіх кватэр вымушаны былі перасяліцца. І гэта прытым што дом новы. Яму няма і пяці гадоў.
Прычыну зараз высвятляюць эксперты. З жыхарамі сустрэлася Вікторыя Патоня. Гэты пакой Ганны Калягінай далёкі ад інтэр’ернай эстэтыкі. Каб столь не абвалілася на гаспадыню кватэры, будаўнікі 10 дзён таму ўсталявалі падпоркі. Мера часовая, але неабходная. На сценах маякі, каб сачыць за іх рухам. А пасля тэхнічнай дыягностыкі на рукі выдалі дакумент: эксплуатаваць пакой забаронена з-за 4-га ўзроўню небяспекі. Праселі аконныя праёмы, праз кладку гуляе вецер.
Да якасці будаўнічых работ у Ганны ёсць пытанні. Каб пераехаць у доўгачаканаую кватэру, жанчына ўзяла крэдыт на 20 гадоў. Але зараз з двума дзецьмі вымушана жыць разам з бацькамі. Тут заставацца неяк боязна. Трэшчыны ў суседзяў праз сценку, аналагічная сітуацыя з 1-а па 5-ты паверхі.
Жыхары шматпавярхоўкі лічаць дом аварыйным. На Сальнікава, 36 пражываюць 35 сем’яў, у асноўным шматдзетныя. Дом уваходзіць у спіс сацыяльнага жылля.
Дом пабудаваны ў новым мікрараёне. Яму ўсяго 4 гады. Знешне выглядае даволі прыстойна. Зроблены з цэглы і пабудаваны на палях. Цяжка ўявіць, што ўнутры знаходзіцца ў ім небяспечна.
Будаўнічыя работы тут вялІся з перапынкамі. Праект неаднаразова пераглядаўся і таннеў. Заказчыкам узвядзення выступала гарадское ўпраўленне капітальнага будаўніцтва. Падмурак і сцены ўзводзілі спецыялісты будаўнічага трэста № 8. Дарэчы, на сайце прадпрыемства сцвярджае: будуюць хутка, якасна, надзейна, на стагоддзі. Гэта ў тэорыі, а на практыцы.
Ад каментарыяў і заказчык, і падрадчык адмовіліся. Вельмі занятыя або, хутчэй за ўсё, сказаць людзям няма чаго.
Сітуацыя на кантролі мясцовых улад, хоць аварыйным дом яны не прызнаюць. Чаму шматпавярхоўка разбураецца – пакажа экспертыза. Спецыялісты праверылі грунт у падвале, нагрузку падмурка і абследаванне кватэр.
Дом яшчэ на гарантыі. Таму ўсе работы па рэканструкцыі і аздабленні кватэр павінен выканаць будаўнічы трэст № 8. Магчыма, гэта не адзіны такі выпадак. Жыльцы дома насупраць таксама назіраюць, як у іх кватэрах растуць расколіны, па вертыкалі і гарызанталі трашчаць сцены.
