У Мінску сёння снегу стала менш. Яго сваёй прыгажосцю, усмешкамі і мілатой распалілі прыгожыя дзяўчаты. У сталіцы трэці раз адбыўся марафон Beauty Run. Забег, які стаў міжнародным, сабраў рэкордную колькасць удзельніц - больш як 3 тысячы далікатных і цягавітых, адважных і абаяльных. Дзеля іх частку праспекта Незалежнасці перакрылі.
На дыстанцыю разам з актывісткамі выйшла і наш карэспандэнт Крысціна Камыш. Задоўга да старту вестыбюль Беларускага дзяржаўнага ўніверсітэта быў напоўнены жаночымі галасамі і пералівамі смеху. Удзельніцы марафону Beauty Run атрымлівалі нумары. Хто прыехаў крыху раней, актыўна размінаўся. Гонка чакалася экстрэмальнай - на вуліцы мінус два градусы, парывісты вецер і снег.
Тысячы дзяўчат, жанчын і бабуль. Самай маленькай бягунцы ўсяго 2 гады і 8 месяцаў. Самай дасведчанай - 18. Беларусь, Расія, Украіна, Латвія, Польшча. Beauty Run - інтэрнацыянальнае свята.
Час 12:00. Усе прыгажуні гатовыя. Праўда, не абышлося без фальстарту. Стартавалі лэдзі ад галоўнага корпуса БДУ. Рухаліся па праспекце Незалежнасці. На выбар было дзве дыстанцыі - 2 кіламетры і 5. Хто выбраў першую, разварочваўся побач з Палацам Рэспублікі. Той, хто больш цягавіты, дабег да плошчы Перамогі. Вось такім прыгожым і дружным натоўпам - толькі наперад!
Мужчыны да марафону дапушчаліся толькі ў якасці падтрымкі і апоры. Але сярод іх таксама выбіралі лепшых. Кожная ўдзельніца пасля фінішу атрымала медаль і кветкі. Аб часе, зрасходаваным на пераадоленне кіламетраў, задумваліся нешматлікія. Пераможцы і прызёры з'ехалі дамоў з прызавымі.
Былі і энтузіясткі. Дзяўчаты спецыяльна рабілі да свята касцюмы. Прынцэса, балярына, супервумен, анёл. Хоць галоўная мэта не маскарад, а спорт.
Лепшая палова чалавецтва паказала, як трэба адзначаць святы. Зараз Беларусь пачынае рыхтавацца да забегу адважных 9 Мая і сямейнага марафону 15-га.
