Лепшыя знаўцы сталіцы ўсё часцей збіраюцца, каб патрэніраваць свой інтэлект і пазмагацца за карысныя прызы. У Мінску становяцца папулярнымі тэматычныя квізы. Паводле слоў арганізатараў, віктарыны новага фармату - выдатная альтэрнатыва вячэрняму паходу ў кіно ці ў кафэ. Смарт-квіз у сталічных івент-прасторах праводзяць два разы на месяц.
На адным з інтэлектуальных батлаў пабываў Ілья Цвяткоў.
А зараз увага - пытанне! Для сталічных знаўцаў праходзіць інтэлектуальная віктарына ў новым фармаце. Праверыць узровень свайго IQ у адной з мінскіх івент-прастор сабраліся дзясяткі мінчан.
Дзевяць раўндаў, сорак пяць пытанняў і дзве з паловай гадзіны выдатнага настрою. Смарт-квіз новага фармату ў сталіцы праводзяць ужо другі раз. Удзельнікі адгадваюць папулярныя кампазіцыі, адказваюць на пытанні з блоку IQ і нарэшце дэманструюць нестандартнае мысленне і логіку.
Глеб Здаравінін, арганізатар квіза: "Наша асаблівасць у тым, што ў нас кожную гульню новая праграма, ёсць аніматары і абавязкова жывая музыка. Выступаюць кавер-бэнды, і яны выконваюць большую частку музычных заданняў для нашых удзельнікаў. Ну, і вядома, у нас заўсёды модныя і цікавыя прасторы для гульняў".
Удзельнічаць могуць усе ахвочыя, галоўнае - паспець зарэгістраваць сваю каманду на сайце арганізатараў. Гуляць лепш з сябрамі і калегамі, бо ўменне працаваць у камандзе і разуменне паміж інтэлектуаламі - першы крок да перамогі.
Пасля трох раўндаў і супергульні журы падводзіць вынікі. Каманды лепшых знаўцаў, якія набралі найбольшую колькасць балаў, атрымліваюць карысныя прызы і бонусы на наступную гульню.
Паводле слоў арганізатараў, падобныя віктарыны – гэта выдатная альтэрнатыва ў забаўнай індустрыі горада. Наступны квіз адбудзецца дванаццатага лютага. На гульню рэкамендуюць зарэгістравацца загадзя.
У Мінску становяцца папулярнымі тэматычныя квізы
23 января 2020