У Мінску адкрыўся 4-ы навуковы касмічны форум

Да гэтага канферэнцыю прымалі Турцыя, В'етнам і Чылі. Правядзенне форуму ў Беларусі стала своеасаблівым прызнаннем нашай краіны касмічнай дзяржавай.

Падрабязнасці - у Ксеніі Рабчынскай.

На форуме будуць абмяркоўваць выкарыстанне касмічных тэхналогій для развіцця сацыяльна-эканамічнага патэнцыялу нашай краіны і ўсіх краін-удзельніц. У спісе запрошаных 25 дзяржаў, сярод іх Германія, Швецыя, Іспанія, Малайзія і, вядома, Расія. У Раскосмаса ўжо ёсць пэўныя прапановы для сумесных праектаў з беларускімі навукоўцамі.

Акрамя таго, на канферэнцыі адзначаюць, што Беларусь паспяхова асвойвае касмічную прастору і самастойна: напрыклад, усе звесткі з айчыннага спадарожніка (нагадаем, ён быў выведзены на арбіту ў 2012) нашы навукоўцы апрацоўваюць самастойна, без прыцягнення спецыялістаў з іншых краін. Правядзенне канферэнцыі такога высокага ўзроўню ў Мінску яшчэ раз паказвае, што ў Беларусі ёсць перспектывы ў касмічнай галіне.