У МЗС Беларусі сёння адкрылася фотавыстава, прымеркаваная да 70-годдзя стварэння ААН. Адкрылі экспазіцыю Міністр замежных спраў Уладзімір Макей і прадстаўнік ААН у Беларусі Санака Самарасінха. На здымках - гістарычныя моманты ўдзелу нашай краіны ў арганізацыі. Як падкрэсліў Уладзімір Макей, Беларусь настроена на яшчэ больш цеснае ўзаемадзеянне з ААН і ўсімі без выключэння краінамі ў сувязі з выклікамі і пагрозамі, якія ўзнікаюць у свеце.
Уладзімір Макей, Міністр замежных спраў Беларусі: "Безумоўна, 70 гадоў - сур'ёзны ўзрост для арганізацыі, для праверкі яе на трываласць і запатрабаванасць. ААН дасягнула значных вынікаў у сваёй дзейнасці. Гэта, я думаю, кожны прызнае. Але яшчэ многае трэба зрабіць з улікам тых новых выклікаў, якія з'яўляюцца перад чалавецтвам. Беларусь у выніку 70-гадовай працы ў ААН назапасіла значны вопыт і вялікі пазітыўны багаж у супрацоўніцтве".
Санака Самарасінха, пастаянны прадстаўнік ПРААН у Беларусі: "Варта адзначыць вядучую ролю, якую Рэспубліка Беларусь адыгрывае ў Арганізацыі Аб'яднаных Нацый, таму што ваша краіна з'яўляецца прыхільнікам шматбаковай дыпламатыі. Беларусь адыгрывае актыўную ролю ў вырашэнні такіх пытанняў, як барацьба з гандлем людзьмі, барацьба з катастрофамі, напрыклад, з наступствамі чарнобыльскай трагедыі, з якой было вынесена шмат урокаў. Таксама Беларусь звяртае ўвагу на важнасць працягу супрацоўніцтва з краінамі, якія маюць сярэдні ўзровень даходу. Вы актыўна ўдзельнічаеце ў фарміраванні нашай будучыні. Беларусь была актыўным удзельнікам адкрытай рабочай групы, якая ў рамках ААН рыхтавала праект мэт устойлівага развіцця. Таму, я б сказаў, што Рэспубліка Беларусь з'яўляецца лідарам у галіне супрацоўніцтва з ААН і рэалізацыі нашых ініцыятыў. Мы спадзяёмся на працяг цеснага супрацоўніцтва з вашай краінай".
Таксама ў рамках святочных мерапрыемстваў у будынку знешнепалітычнага ведамства прайшла цырымонія памятнага гашэння паштовай маркі "70 гадоў ААН". Яна выпушчана "Белпоштай" сумесна з МЗС Беларусі. Акрамя таго, прысутныя паказалі работы фіналістаў Рэспубліканскага конкурсу дзіцячага малюнка "ААН вачамі дзяцей".
