У Гомелі затрымалі злачынцаў і абясшкодзілі бомбу. Праўда, гэта падчас вучэнняў: у горадзе над Сожам прайшоў чэмпіянат унутраных войскаў па службовым шматбор'і кінолагаў. Паласа перашкод, пошук забароненых рэчываў - экзамены службовыя сабакі здавалі некалькі дзён. За спаборніцтвамі назірала Ганна Кавалёва.
Выстрал, каманда фас, і аўчарка кідаецца наперад. Пастановачны баявік - адзін з этапаў чэмпіянату сярод кінолагаў. І калі гледачы ўспрымаюць гэта як вучэнні, для сабакі адрознення рэальнасці ад пастаноўкі - няма.
Затрымаць зламысніка для гэтых сабак - службовы абавязак. Іх не павіны спалохаць ні выстралы з пісталета, ні крыкі людзей. Затрыманне, канваіраванне і ахова - самае складанае і відовішчнае выпрабаванне.
Сцэнарыем кіруе кінолаг. Толькі па яго камандзе сабака расціскае сківіцы. Умоўным злачынцам прыходзіцца несалодка. Ад укусаў і рваных ран ратуе спецыяльная тканіна і ватны напаўняльнік. Важыць касцюм 15 кілаграмаў. Аляксей Хмыль носіць яго 25 гадоў.
Пакуль адны ловяць злачынцаў, другія шукаюць наркотыкі і ўзрыўчатку. Гэты этап - у адным са складскіх памяшканняў. Дакладнасць пошуку не менш важная, чым хуткасць.
У кожным кіналагічным дуэце - свая мова. Адзін сабака падчас знаходжання наркотыкаў садзіцца, другі - брэша. І толькі кінолаг разумее вердыкт. Таму выдатны нюх - не гарант поспеху. Служба заўсёды дзеліцца на дваіх. Галоўнае - зладжанасць дзеянняў. Пра гэта Віталь Карыткін ведае як ніхто. Яго сабака - двухразовы чэмпіён Беларусі. І калі тут для іх проста пастановачныя практыкаванні, у рэальнай службе на плячах - канваіраванне асуджаных і затрыманне пасля ўцёкаў.
Сёлета за званне чэмпіёна змагаліся 55 чатыроногіх прафесіяналаў з усёй краіны: ад прадстаўнікоў воінскіх часцей да прадстаўнікоў службы бяспекі Прэзідэнта. Дарэчы, зараз у Беларусі праходзяць выпрабаванні прыбора, які па аналогіі з металашукальнікам знаходзіць наркотыкі. Праўда, спісваць службовых сабак з-за гэтага не спяшаюцца.
Выходзіць, што пакуль ніводная найноўшая тэхніка не можа сапернічаць з сабачыным носам і тым больш з гатоўнасцю адстойваць бяспеку краіны і жыцці людзей ў любой сітуацыі.
