Галоўнай падзеяй 3 ліпеня, безумоўна, стане парад. У Дзень Незалежнасці гледачы ўпершыню ўбачаць і гордасць беларускіх вайскоўцаў - комплекс "Шэршань". Яму па зубах нізкалётныя самалёты, беспілотнікі і любыя браніраваныя цэлі. Айчынную распрацоўку прадэманструюць на платформе магутнага "Волата". Інжынерныя рашэнні нашага супрацьтанкавага ракетнага комплексу лічацца ўнікальнымі сярод канкурэнтаў. І Беларусь - сярод лідараў у гэтым сегменце рынку.
Агенцтва тэленавін працягвае прэм'еру праекта "Тэхніка і асобы параду". Мы распавядаем аб машынах і людзях, якія стаяць на варце незалежнасці Беларусі. Знаёмцеся - беларускі "Шэршань" .
Здольнасць паражаць шырокі спектр цэляў зрабіла супрацьтанкавыя ракетныя комплексы адным з найбольш масавых відаў узбраенняў. І за апошнія 60 гадоў яны выкарыстоўваліся практычна ва ўсіх узброеных канфліктах і лакальных войнах.
Масавая вытворчасць і пастаўка ў войскі супрацьтанкавых ракетных комплексаў у краінах НАТА і СССР - гэта канец 50-х. І гэта былі комплексы першага пакалення, якімі складана было кіраваць па трох пунктах: вока, ракета, цэль. Гэта значыць аператару трэба было сумясціць гэтыя тры пункты ўручную.
Беларускія супрацьтанкавыя ракетныя комплексы ўжо трэцяга пакалення. Гэта значыць яны не патрабуюць удзелу аператара ў палёце ракеты, і таму іх называюць "выстраліў - забыў".
Гэта "Шэршань". Б'е дакладна ў цэль, як і насякомае, якім ён названы. За кошт арыгінальных тэхнічных рашэнняў лепшы за папярэднікаў.
На далёкасці да пяці кіламетраў можа паразіць любую браніраваную цэль. Ад яго не схавацца бункеру і доту, і не ўцячы нізкалётным верталётам і беспілотнікам.
Прыцэльная далёкасць стральбы ў паўтара-два разы лепшая, чым у танкавых гармат. Пры гэтым час палёту ракеты на максімальную адлегласць не перавышае 24 секунды. А каб развярнуць комплекс і прывесці ў баявую гатоўнасць, двум вайскоўцам патрэбныя ўсяго дзве хвіліны.
Высокую дакладнасць камплекту забяспечвае лазерная сістэма навядзення, абароненая ад перашкод. Прыбор распрацаваны на беларускім "Пеленгу". Ён можа знайсці цэль, захапіць яе. Той самы прынцып "бачу - страляю" і лазерна-прамянёвая сістэма кіравання даюць комплексу важкія перавагі.
Цеплавізары не дадуць выслізнуць цэлі нават ва ўмовах дрэннай бачнасці. І сёння гэта адзіны прыбор навядзення СТРК, у якога ёсць убудаваны лазерны дальнамер. Плюс да таго ёсць магчымасць змяніць задачу для запушчанай ракеты, калі з'явіцца побач больш сур'ёзная небяспека.
Рынак супрацьтанкавых ракетных комплексаў адзін з самых хуткарослых. І Беларусь сярод сусветных лідараў. Гэта пацвярджае і высокая цікавасць да беларускага "Шэршня".
