Ратавальнікі патрулююць вадаёмы па ўсёй краіне. У зоне рызыкі рыбакі і дзеці. Так, за апошнія некалькі дзён з вады ратавальнікі выцягнулі двух рыбакоў і падлетка. У чым каварства вясновага лёду, даведваліся нашы карэспандэнты.
Расказвае Вікторыя Патоня. Гэты дзень 25-гадовы Яўген Вістоўскі запомніць надоўга. Ён жыве насупраць возера, дзе вечарам гулялі двое школьнікаў. Пра тое, што за 15 метраў ад берага тонуць двое, Яўгену паведаміла маці. Яна ішла з сяброўкай па вуліцы і выпадкова заўважыла дзяцей, якія праваліліся пад лёд. Жанчына гаворыць: хлопчыкі не звалі на дапамогу, а спрабавалі выбрацца з палонкі самастойна.
Да возера прыехалі ратавальнікі і хуткая дапамога. Цела 15-гадовага школьніка вадалазы МНС паднялі з 4-метровай глыбіні. Другога падлетка даставілі ў бальніцу. Зараз яго жыццю нішто не пагражае.
Больш за дэкаду слупок тэрмометра вышэй за нуль. Лёд на вадаёмах нетрывалы. У 12-ці раёнах Брэсцкай вобласці афіцыйна забаронена выходзіць на лёд.
Спецыялісты гавораць: калі таўшчыня лёду не перавышае 7 сантыметраў, то выходзіць на яго строга забаронена. Зараз пры плюсавай тэмпературы лёд дастаткова тонкі і не здольны вытрымаць нават дзіця.
Сёлета за два месяцы на вадаёмах краіны выратаваныя 20 чалавек. Загінуўшых 19, 10 з іх - у Брэсцкай вобласці. У групе рызыкі дзеці і рыбакі. Калі з першымі заклікаюць пагутарыць дарослых, то з аматарамі экстрэмальнай рыбалкі ратавальнікі размаўляюць асабіста. Патрулююць вадаёмы. Але рыбакі ўпэўненыя ў сваёй праўдзе, часта пагібельнай: небяспека вясновага лёду не ў таўшчыні.
Непрадказальнасць цёплых цячэнняў, нераўнамернае раставанне лёду - верагоднасць праваліцца павялічваецца ў некалькі разоў.
Прэс-сакратар МНС на сваёй старонцы заклікаў бацькоў пагаварыць пра гэта з дзецьмі.
Трываласць лёду можна вызначыць візуальна. Самы небяспечны колер - бела-матавы. Па словах спецыялістаў, на выратаванне чалавека, які праваліўся пад лёд, ёсць не больш за 10 хвілін.
