Паказаць уменне дзейнічаць ў экстрэмальных умовах на практыцы. У Барысаве прайшоў фінал рэспубліканскага конкурсу па ратавальным мнагаборстве сярод моладзі. Студэнты з усіх рэгіёнаў дэманстравалі правілы пажарнай бяспекі, а таксама фізічную падрыхтоўку. Рэпартаж Наталлі Кузьміцкай.
Першасныя сродкі пажаратушэння, умовы, спрыяльныя для распаўсюджання агню і дзеянні пры з'яўленні дыму ў закрытым памяшканні - гэта напэўна самыя лёгкія пытанні з тэставага задання. 7 лепшых студэнцкіх атрадаў, спачатку ў тэорыі, а потым і на практыцы, ператварыліся ў сапраўдныя выратавальныя каманды.
Масты, лабірынты і завалы - этапы паласы перашкод максімальна набліжаныя да рэальных умоў працы ратавальнікаў.
У гэтым этапе ўдзельнічалі 8 чалавек ад кожнага атрада - і юнакі, і дзяўчаты. Спаборніцтва каманднае, таму, як і ў жыцці, неабходна была стратэгія. Наймацнейшыя спачатку дапамагалі пераадолець перашкоды слабейшым.
Каманду з Мінскай вобласці сёлета прадставіў студэнцкі атрад з Салігорска. Да фіналу рэспубліканскага конкурсу доўгі час рыхтаваліся ў гарадскім цэнтры па надзвычайных сітуацыях.
На вучэбным палігоне, дзе звычайна трэніруюцца прафесійныя ратавальнікі, студэнты на хуткасць тушылі пажары, эвакуіравалі пацярпелых з борта аварыйнага самалёта, праводзілі ратавальныя аперацыі на вадзе і прамысловых аб'ектах.