У Вялікім тэатры Беларусі прайшоў 11-ты навагодні баль

14 Студзеня 2020
Гэтай ноччу беларусы сустрэлі стары Новы год. У Вялікім тэатры прайшоў 11-ты навагодні баль. Вялікую танцавальную ўрачыстасць наведала больш за тысячу гасцей. Квіткі набывалі ў ЗША, Францыі, Японіі, Нідэрландах і Швейцарыі. 

Эмоцыі ўрачыстасці і яе рытмы - у рэпартажы Лідзіі Заблоцкай

Калядны Галівуд і атмасфера XVIII стагоддзя - мікс навагодняга балю ў Вялікім тэатры

Кожны, хто правёў гэтую ноч у Вялікім тэатры, не толькі нацешыўся атмасферай XVIII стагоддзя, але і патрапіў у калядны Галівуд. Тут па імправізаванай чырвонай дарожцы прайшліся Манро і Чаплін. А пасля разам з парамі - дарэчы, іх было 156 - танцавалі мазурку і польку.

156 пар прынялі ўдзел у балю

Геаметрыю рухаў і набор танцавальных па яны сталі вывучаць яшчэ ў кастрычніку. Спецыяльна для ахвочых - штотыднёвыя рэпетыцыі ад майстроў Вялікага. Як вынік, на ўрачыстым балю сем нумароў - ад мазуркі да складанага вальса. 

Майстры Вялікага правялі для гледачоў танцавальны лікбез

Гледачы таксама змаглі павучыцца танцам. Адразу пасля балю-адкрыцця - майстар-клас для пачаткоўцаў.

Для тысячы гледачоў - музычныя віктарыны, варожбы, гульня ў "Мафію"

І гэта не адзіная зона забавак. На больш як дзвюх тысячах квадратных метраў іх дзясяткі. Кожны мог праверыць свае веды ў галівудскай музыцы. Або з незнаёмцамі вылічыць "мафію".
 

Оперныя галасы Вялікага тэатра выканалі сусветныя хіты

Пад бой курантаў канцэрт-сюрпрыз. Галасы Вялікага на адну ноч змянілі рэпертуар і заспявалі сусветныя хіты на галоўнай сцэне. Не абышлося без эстрады і джаза. Такое ў Вялікім рэдка ўбачыш. 

Сярод гасцей сустракаем і Санту. Спецыяльна для вас атрымалі прагноз на 2020.

А далей класіку змяніла раскоша Галівуда. Урачыстасць працягнулі Чаплін-балем і караоке. 

Гадзіннікі ўжо прабілі поўнач, але па традыцыі баль працягнецца да раніцы. Для тысячы гасцей гэтая ўрачыстасць стане, мабыць, самым яркім уражаннем у 2020.