Яны былі выяўленыя на тэрыторыі бабруйскай крэпасці гэтым летам. 17 салдат удалося апазнаць па медальёнах. Іх сваякі першымі ўсклалі кветкі на могілкі.
Падрабязнасці ва Уладзіміра Сёмкіна: Гэтыя кадры былі знятыя летам на тэрыторыі былой воінскай часці ў Бабруйску. Неўстаноўленае пахаванне выявілі падчас правядзення будаўніча-мантажных работ. На месца выехалі спецыялісты. Брыгада 52-га спецыялізаванага батальёна выявіла часткі воінскага абмундзіравання савецкага ўзору, гэта дазволіла выказаць здагадку, што тут пахаваныя байцы Чырвонай арміі.
Сёння ўсталявана, што гэта расстраляныя вязні канцлагера, які размяшчаўся на тэрыторыі былой бабруйскай крэпасці. Яўген Аляксандравіч - відавочца тых страшных падзей.
Яўген Чабан, жыхар Бабруйска: Калючым дротам агароджаныя як жывёла ляжалі і стаялі ваеннапалонныя. Лісце на дрэвах было ўсё з'едзенае. Ніякай расліннасці не было. А за дротам крычалі жанчыны…
Падчас раскопак выявілі некалькі дзясяткаў медальёнаў. 17 з іх былі расшыфраваныя. Адзін з іх належаў Яфіму Галофіну. Галіна - унучка расстралянага чырвонаармейца. Сама родам з Расіі, жыве ў Бабруйску. Часцінку праху дзеда яна ўжо адвезла на радзіму.
Усяго ля падножжа крэпасці было знойдзена больш за паўтысячы астанкаў. Сёння на месцы былога канцлагера адбылося перапахаванне байцоў Чырвонай арміі. Наступным крокам стане ўсталяванне тут мемарыяла.
Толькі на тэрыторыі Магілёўскай вобласці загінула каля 300 тысяч чалавек. За мужнасць і стойкасць у гады Вялікай Айчыннай вайны ўзнагароджаны памятным вымпелам чатыры гарады: Бабруйск, Клічаў, Крычаў і Магілёў.
Самым важным стане магчымае прысваенне Магілёву звання Горад-герой. З такім хадайніцтвам звярнуліся ветэраны ў Магілёўскі аблвыканкам. Кіраўніцтва рэгіёну ў сваю чаргу паабяцала звярнуцца з гэтым пытаннем у Выканаўчы камітэт СНД.
