У Беларусі ўпершыню перасадзілі сэрца 10-гадовай дзяўчынцы

18 Чэрвеня 2019

Аперацыя прайшла ў пачатку чэрвеня, і сёння, у дзень свайго нараджэння, пацыентка выдатна сябе адчувае і прымае падарункі ад дактароў. Трансплантацыю галоўнага органа дзецям да 18 гадоў за гісторыю беларускай медыцыны праводзілі тройчы. І кожная такая складаная аперацыя, вядома, не застаецца без увагі ў сусветнай супольнасці кардыёлагаў. Пра  жыццё з новым сэрцам  рэпартаж Юліі Грызунт.

Нягледзячы на тое што Дар'і Кірыковіч усяго 10 гадоў, яна лепш за многіх дарослых ведае асаблівасці  функцыянавання галоўнага органа. Будову сэрца вывучала не па кнізе, а па УГД-здымках свайго ўласнага. Паўтара месяца дзяўчынка правяла ў рэанімацыі практычна ў непрытомнасці. А сёння адзначае сваё 11-годдзе ўжо на нагах. Дактары арганізавалі ёй сапраўднае свята з кветкамі і падарункамі. І ўсё ж галоўнае жаданне імянінніцы ў гэты дзень - як мага хутчэй вярнуцца дамоў да  родных. 

Дар'я стала першым у нашай краіне дзіцем, якому перасадзілі сэрца ў такім юным узросце. Аперацыю праводзілі тры хірургі і анестэзіёлаг. Урачы прызнаюцца: дзіцячая працэдура нічым не адрозніваецца ад дарослай. Самы цяжкі перыяд - чаканне аперацыі. 

Сяргей Спірыдонаў, намеснік дырэктара па хірургічнай дапамозе РНПЦ "Кардыялогія": "Праблема ў тым, што вельмі нялёгка падабраць донарскі орган для такога маленькага арганізма. Сэрца павінна быць таксама невялікіх памераў, каб яно магло змясціцца ў грудную клетку".

Дасягненні такога ўзроўню адразу становяцца набыткам сусветных кардыёлагаў. Дарэчы, праз некалькі  дзён у нашу краіну прыляцяць хірургі з Лондана, каб навучыцца рабіць аперацыі з выкарыстаннем мадэляў сэрца, надрукаваных на 3D-прынтары. 

Летась у нас праходзілі стажыроўку кардыёлагі з Германіі. У найбліжэйшы час на навучанне плануюць прыехаць спецыялісты з Польшчы і Румыніі. Нашы хірургі ў сваю чаргу рэгулярна ездзяць на стажыроўку ў Францыю,  Італію і Амерыку.

Штогод у Беларусі праводзяць прыкладна паўсотні трансплантацый сэрца. У 2019 годзе ўжо 28 перасадак. Няпростае ўмяшанне ў нашай краіне навучыліся рабіць за 10 гадоў. І ўсяго тройчы такімі пацыентамі станавіліся дзеці да 18 гадоў.

Часцей за ўсё малыя з сардэчнай недастатковасцю трапляюць у РНПЦ дзіцячай хірургіі. І тут робяць усё, каб прадухіліць трансплантацыю. Сучасныя тэхналогіі дазваляюць праводзіць складаныя кардыяпрацэдуры ўжо ў першую гадзіну жыцця нованароджанага. Часам такія дзеці важаць менш за кілаграм. І сёння нашы медыкі не без гонару канстатуюць: беларускія ўрачы не толькі ведаюць як, але і ўмела змагаюцца з любым з 250 парокаў сэрца. 


Папулярныя

Рэкамендуемыя

Зараз чытаюць

Рэкамендуемыя