У Беларусі сёння завяршыўся тэрмін выплаты збору на фінансаванне дзяржвыдаткаў за 2015 год

20 Лютага 2017

Згодна з Дэкрэтам № 3, яго павінны выплаціць грамадзяне, якія ў гэты перыяд не працавалі, не плацілі падаткі, але выкарысталі ўсе сацыяльныя гарантыі. Адзначым, ужо аплацілі збор больш за 50 тысяч грамадзян. Насустрач пайшлі тым, хто аказаўся ў складанай жыццёвай сітуацыі, іх вызвалілі ад збору. Напрыклад, толькі ў Віцебскай вобласці з разгледжаных дакументаў 95 % вырашаны на карысць заяўніка. Праца мясцовых камісій працягнецца і далей. Да кожнага падыход індывідуальны. На пастаяннай аснове будуць праходзіць і выязныя прыёмы грамадзян Адміністрацыяй Прэзідэнта. Асабістыя сустрэчы прадстаўнікоў вертыкалі ўлады і дэпутацкага корпуса з жыхарамі рэгіёнаў прайшлі і сёння.

З якімі праблемамі звярталіся беларусы - даведалася Вольга Маслоўская. На прыём да старшыні Гомельскага гарвыканкама Людміла Акшэўская прыйшла прасіць за сына. 19 гадоў таму яму зрабілі аперацыю на руцэ, у 2014 годзе - паўторную. Працаваць у 2015 па медыцынскіх паказаннях ён не мог. Жанчына ўпэўнена: як толькі здароўе сына пойдзе на папраўку, ён знойдзе працу і будзе плаціць падаткі. Зараз просіць ад выплаты збору яго вызваліць. І адразу атрымлівае станоўчы адказ.

Цяжкая хвароба, вучоба на завочным аддзяленні, працяглыя пошукі працы - сітуацыі ва ўсіх розныя. Старшыня Гомельскага гарвыканкама раіцца з юрыстамі і медыкамі. Дае даручэнне рабочай групе - разгледзець не толькі магчымасць вызвалення ад выплаты, але і працаўладкавання. Дапамогуць знайсці працу і дачцэ Ларысы Кузьменкі. У 2015 студэнтка-завочніца пісала дыплом, праходзіла практыку, а знайсці працу пасля заканчэння ВНУ не змагла.

Асабістыя прыёмы грамадзян - не ноу-хау апошняга тыдня, а звычайная форма працы ўлады з людзьмі. Часцей сустрэчы сталі прызначаць, каб пачуць кожнага і да кожнага данесці: Дэкрэт № 3 - для чалавека. Бо фінансаванне дзяржаўных выдаткаў - гэта прамыя інвестыцыі ў ахову здароўя, адукацыю і бяспеку.

У тым, што плаціць падаткі - абавязак кожнага грамадзяніна, сацыяльны педагог Наталля Яфімава перакананая. Працуе ў школе. З-за хваробы ў 2015 годзе ў кар'еры здарыўся перапынак. Аперацыя, доўгая рэабілітацыя. Выйсці на працу здароўе дазволіла толькі праз год. Нядаўна атрымала паведамленне з падатковай. Па параду жанчына прыйшла да дэпутата Палаты прадстаўнікоў Людмілы Дабрынінай.

Няпростую жыццёвую сітуацыю жыхарка Оршы пацвердзіла даведкамі з медустаноў. Рашэнне адназначнае - жанчына ад выплаты збору вызвалена.

А вось маці, якія прыйшлі на прыём замест сваіх дзяцей, што працуюць у Расіі, канчатковы адказ пакуль не атрымалі. Патрэбны дакументы.

Разам з дэпутатам працавалі прадстаўнікі камісіі, у кампетэнцыю якой уваходзіць даванне льгот па выплаце збору. Сёння апошні тэрмін, калі варта гэта зрабіць. Каб не хадзіць заяўніку па кабінетах, на тры гадзіны ў адной зале сабралі ўсіх спецыялістаў.

Пакуль заява знаходзіцца на разглядзе, чалавек можа пачакаць з выплатай збору да вынясення рашэння. Час ёсць і ў тых, хто атрымае паведамленне пасля 20 лютага. У гэтым выпадку ў запасе 30 дзён.

Праца камісій працягваецца. Галоўнае - індывідуальны падыход да кожнай сітуацыі. Як вынік - з разгледжаных дакументаў толькі ў Віцебскай вобласці 95 % вырашаны на карысць заяўніка.