У Беларусі развіваецца прамысловы турызм

14 июня 2021

Новыя эмоцыі, веды, а, магчыма, і выбар будучай прафесіі. Беларусы і госці нашай краіны ўсё больш наведваюць айчынныя прадпрыемствы ў якасці прамысловых турыстаў. За чатыры гады гасцямі МТЗ сталі звыш 15 тысяч чалавек. Вялікая цікавасць да БелАЗа, кандытарскіх і малочных камбінатаў. Для прадпрыемстваў гэта як камерцыйныя, так і іміджавыя праекты.

Для наведвальнікаў магчымасць бліжэй пазнаёміцца з легендарнымі брэндамі і наладзіць кантакты. У прамысловы тур адправілася і наша здымачная група. Расказвае Аляксей Кандраценка.

Машынабудаўнікі ў топ-5 папулярных напрамкаў прамысловага турызму

Музей МТЗ - як вялікая аўдыторыя для пазакласнага ўрока. 40 школьнікаў з аграгарадка Самахвалавічы вывучаюць гісторыю завода ў экспрэс-фармаце. Тут і мадэлі знакамітых трактароў, і ордэн Палярнай зоркі ад Манголіі, і нават сапраўдныя зоркі ў космасе ў гонар Мінскага трактарнага завода. Далей па курсе - самі машыны на дэманстрацыйнай пляцоўцы, дзе абавязковы хітмэйкер - самы магутны трактар на 450 конскіх сіл.

Вось тое месца, куды хацелі б трапіць многія. Корпус зборкі трактароў, дзе знаходзіцца галоўны канвеер завода.

За апошнія чатыры гады МТЗ наведалі больш за 15 тысяч турыстаў амаль з 70 краін. Попыт на тое, каб убачыць дзе і як ствараюць легендарных "Беларусаў" ёсць і сёння.

Сяргей Сідаровіч, намеснік начальніка музейна-прамысловага цэнтра па прамысловым турызме ААТ "МТЗ":

Нас наведваюць ад трэцяга да дзявятага класа. І кожная экскурсія - гэта свайго роду прафарыентацыя і азнаямленне з рабочымі спецыяльнасцямі. Мы паказваем, напрыклад, слесара механазборачных работ, які збірае тэхніку.

Гэта Жодзіна, куды на Беларускі аўтазавод разам прыехалі і мінчане, і масквічы. Старт экскурсіі таксама ў музеі.

Сярод гасцей і Павел Спецыян - выкладчык камп'ютарнай акадэміі з расійскай сталіцы. Прагрэсіўны прамысловы турыст: аб'ездзіў шмат краін, пабываў на дзясятках заводаў. На БелАЗе - з сынам і дачкой.

Павел Спецыян, прамысловы турыст (Масква):

Я быў на кар'ерах у шматлікіх месцах і бачыў як БелАЗы працуюць. Гэта было ў Данецкай і Кемераўскай вобласці. Гэта нейкія неверагодныя штукі. Тут вельмі крутая інфраструктура, і я нават не ведаў, колькі ўсяго вырабляе БелАЗ. А гэта машына на электрычнасці, дызелі, газе. І я пра гэта буду расказваць дзецям і студэнтам, якія ў нас вучацца.

Павел Федзічаў, начальнік аддзела прамысловага турызму і паслуг ААТ "БелАЗ":

У рамках праекта "БелАЗ - брэнд Беларусі" нашы госці знаёмяцца з кар'ернай тэхнікай. У той жа час мы можам прадаставіць паслугу - пракат на кар'ерным самазвале. Сем тураў у нас выходзіць у суткі за рабочы дзень. У сярэднім кожная група ад 30 да 50 чалавек.

Такім чынам на сусветнага рэкардсмена - кар'ерны самазвал на 450 тон - за 6 гадоў у Жодзіна прыехалі паглядзець ужо рэкордныя для нашай краіны 150 тысяч турыстаў. За летні сезон гэтая лічба значна падрасце.