У Беларусі ў 2014 - 2016 гадах правядуць эксперымент для азначэння абгрунтаванага кошту будаўніцтва жылля. Працэдура зацверджаная ўказам Кіраўніка дзяржавы. Эксперымент закране арганізацыі, якія будуюць жыллё па дзяржзаказе для льготнікаў.
Кошт квадратнага метра ў такіх будоўлях будзе вылічвацца зыходзячы з іх сярэдняй заработнай платы на момант здачы дома, прымножанай на каэфіцыент 1,2. Перавышэнне выдаткаў заказчык не зможа ўзяць з кішэні дольшчыка, а будзе абавязаны пагасіць сам. І, наадварот, сэканомленыя сродкі зможа накіроўваць на фінансаванне будаўніцтва наступных жылых дамоў па дзяржаўным заказе. Вынікі эксперыменту падвядуць у канцы 2016 года. І, магчыма, распаўсюдзяць на ўвесь аб'ём дзяржаўнага заказу. Каб устанавіць адзіныя кошты, зразумелыя і будаўнікам, і пакупнікам жылля.
