У Віцебскай вобласці ў дзікую прыроду выпушчаныя пяцьдзесят жывёл. На самую поўнач краіны іх завезлі з Белавежскай Пушчы і ўгоддзяў Гродзенскай вобласці. Паводле апошніх звестак, у Беларусі пражываюць 958 асобін зуброў. Каб убачыць гэтых жывёл, Вольга Маслоўская не адну гадзіну правяла на наглядальнай вышцы.
Восем камер і некалькі гадзін падрыхтоўкі. Навукоўцы разумеюць: гэта эксклюзіўныя кадры. У заказніку "Асвейскі" ў дзікую прыроду выпускаюць паўсотні зуброў, якія амаль два гады былі ў вальеры для ператрымкі паляўнічых жывёл.
За плячамі біёлага і кінарэжысёра Ігара Бышнёва сотні экспедыцый і падарожжаў, але гэтая камандзіроўка пакінула асаблівыя ўражанні.
Аднаўленне паўночнай папуляцыі зубраў - амбіцыйны праект мясцовай паляўнічай гаспадаркі і Нацыянальнай акадэміі навук. У гэтых лясах волаты зніклі больш як стагоддзе таму, іх знішчэнне на сумленні браканьераў.
Сёння, каб зубр выйшаў на волю, яго выманьвалі цукровымі буракамі.
Сцяпан Габрусёнак, дырэктар паляўнічай гаспадаркі "Чырвоны бор": "У 2013-2014 гадах мы закупілі 10 асобін у Белавежскай Пушчы і 30 - у СВК "Азёры" Гродзенскай вобласці. Год яны былі ў вальеры для ператрымкі жывёл. За гэты год з'явілася 11 зубранят. Даволі добры паказчык".
Глухія лясы на мяжы Расонскага і Верхнядзвінскага раёнаў - гэта самы паўночны пункт на зямным шары, дзе зараз на волі жыве папуляцыя зуброў. Разам з волатамі ў дзікую прыроду пайшлі і дзвесце высакародных аленяў, завезеныя з Літвы і Польшчы.
За новай папуляцыяй назіраюць навукоўцы. Адсочваць перамяшчэнне жывёл будуць з дапамогай GPS-ашыйнікаў. Для мясцовых жыхароў зубры небяспекі не ўяўляюць - да найбліжэйшых вёсак тут не менш за дзесяць кіламетраў. Да таго ж самі жывёлы імкнуцца пазбягаць сустрэчы з чалавекам.
Зубр - жывёліна асцярожная. І каб яго ўбачыць, часам трэба не адну гадзіну правесці на наглядальнай вышцы.
Усю зіму ў паляўнічай гаспадарцы будуць падкормліваць жывёл сенажом, збожжам і цукровымі буракамі. Вясной у зуброў пачнецца перыяд актыўнай міграцыі. Папуляцыя будзе самастойна развівацца і расці.
