Сярод іх і першыя асобы міністэрстваў і ведамстваў. Працавалі ў парках і на тэрыторыі помнікаў - у год 70-годдзя Перамогі менавіта мемарыялы сталі самымі папулярнымі месцамі правядзення суботнікаў. Наконт дакладных сум у рублях пакуль гаварыць рана, але вось падвесці вынікі працы самы час. Ксенія Рабчынская пра тое, дзе сёння стала чысцей.
Яго афіцыйнае адкрыццё ў яшчэ даваенным Мінску было запланаванае на 22 чэрвеня 1941-га. Супадзенне даты з пачаткам трагедыі зрабіла гэта немагчымым. Але ўжо праз 4 гады, у трыумфальным 1945-м адкрыццё адбылося, а ён атрымаў гордае імя парк Перамогі.
Бадай, менавіта парк Перамогі стаў самым папулярным пунктам для працы ў суботу на карце Мінска. Што сімвалічна - у год 70-годдзя Вялікай Перамогі. Сюды акультурваць тэрыторыю парку выйшлі адразу некалькі арганізацый і як мінімум паўтары тысячы чалавек.
Свае сілы ў парку Перамогі аб'ядналі сёння "Белая Русь", Федэрацыя прафсаюзаў, Камуністычная партыя і нават ветэраны.
Самае маладзёжнае аб'яднанне краіны працавала на беразе возера, якое больш чым 70 гадоў таму стваралася ў літаральным сэнсе рукамі моладзі. Мала хто ведае, што выкопвалі Камсамольскае возера ўручную камсамольцы і піянеры.
Ідэю навядзення парадку ля мемарыялаў і помнікаў, прысвечаных Вялікай Айчыннай вайне, падтрымала сёння і Федэрацыя прафсаюзаў Беларусі. Працоўны дэсант працаваў на Кургане Славы. Дзякуючы ініцыятыве прафсаюзных аб'яднанняў краіны ўжо да 9 Мая мемарыял будзе адрэстаўраваны.
Міхаіл Арда, старшыня Федэрацыі прафсаюзаў Беларусі: "Сёння гэта і рамонт прыступак, і ў цэлым травяное пакрыццё кургана, яно будзе поўнасцю замененае. Гэта і супрацькратовая сетка, сёння гэта панарамная пляцоўка, гэта падсвет, які робіцца па ўсёй тэрыторыі".
Прадстаўнікі мінскай мэрыі на чале з кіраўніком працавалі ў мемарыяльным комплексе "Малы Трасцянец" у наваколлях Мінска. За некалькі гадзін ад леташняй лістоты ачысцілі 5 гектараў зямлі. Дапамаглі і класці тратуарную плітку.
Узялі ў рукі рыдлёўкі і граблі з самай раніцы і людзі ў форме колеру хакі. У парадак вайскоўцы прывялі тэрыторыі ваенных гарадкоў і мемарыялаў. Усяго каля 400 пунктаў па ўсёй краіне.
А афіцэры з Мінабароны і Генштаба Узброеных Сіл займаліся добраўпарадкаваннем гісторыка-культурнага комплексу "Лінія Сталіна".
Андрэй Раўкоў, Міністр абароны Беларусі: "Асноўныя намаганні падчас выкананняў задач мы прыкладваем да завяршэння прывядзення ў парадак тых пахаванняў, абеліскаў, манументаў, якія прысвечаныя той Перамозе, якія абазначаюць тыя вялікія справы, што былі зробленыя нашымі суайчыннікамі".
Змянілі сёння на рабочыя камбінезоны форму з пагонамі і міліцыянеры. Яны наводзілі парадак на тэрыторыі шпіталя МУС. Але, як прызнаўся міністр унутраных спраў, суботнік для яго - гэта больш чым проста фізічная праца.
Сустракалі вясну сёння і ў Заслаўі. І не толькі ўзмахамі рыдлёвак, але і цэлай новай алеяй - прадстаўнікі Камітэта дзяржкантролю з уласцівай рэвізорам акуратнасцю высадзілі некалькі соцень дрэў.
Супрацоўнікі Міністэрства адукацыі сёння таксама ўзялі ў рукі рыдлёўкі і граблі. Яны наводзілі парадак у Мінску, у цэнтры для дзяцей з парушэннямі слыху.
Тэлевядучыя сёння таксама змянілі дзелавыя касцюмы на рабочую форму. Супрацоўнікі Белтэлерадыёкампаніі наводзілі парадак у апошняй спаленай фашысцкімі карнікамі вёсцы Беларусі - Дальве. Медыяхолдынг шэфствуе над мемарыяльным комплексам з моманту яго стварэння.
Ганна Ялфімава, намеснік генеральнага прадзюсара Белтэлерадыёкампаніі: "Напэўна, тыя, хто сёння сядзеў дома, так і не зразумелі, што на вуліцы па-сапраўднаму горача. Мы тут не мерзнем, таму што працы нямала, мы прыбіраем лес, мы прыбіраем тэрыторыю вакол помніка".
Губернатар цэнтральнага рэгіёна Сямён Шапіра разам з калегамі з Мінаблвыканкама ўдзельнічаў у будаўніцтве яшчэ аднаго корпуса птушкафабрыкі ў Мінскім раёне.
І ўсё ж сёлета галоўны лейтматыў суботніка - наша гісторыя і наша Перамога, якой усяго праз некалькі тыдняў будзе роўна 70. А ўжо сёння на Буйніцкім полі ў Магілёве стараннямі жыхароў горада з'явілася роўна 70 маладых ліп - па адной на кожны мірны год. І яшчэ тры маладыя дубы - як сімвал трох армій, што вызвалялі горад у 1944-м.
У Бабруйску ж у дзень суботніка пачалася гісторыя новага гарадскога парку - сквера Пераможцаў.
Андрэй Каваленка, старшыня Бабруйскага гарвыканкама: "Мы вырашылі закласці ў Бабруйску сквер Пераможцаў на прывакзальнай плошчы, таму што тут адбываліся жорсткія баі. Мы вырашылі пасадзіць тут дрэвы: яблыні і бэз. Яблыні - гэта сімвал Перамогі, бэз знамянуе нашу вясну. Памяць ніколі не забудзе той вялікі подзвіг, які быў адзначаны 70 гадоў таму".
У Гомелі асноўныя працоўныя сілы на чале з губернатарам вобласці былі перакінутыя ў Лоеўскі раён. Да завяршэння будаўніцтва новага мемарыяльнага комплексу на цэнтральнай плошчы Лоева, што ўвекавечыць подзвіг байцоў, якія ўдзельнічалі ў бітве за Днепр, засталося менш як месяц.
У Гродне дзякуючы ўдзельнікам суботніка на чале з кіраўніком вобласці сёння менш працы стала ў будаўнікоў новай школы і дзіцячага сада. І тут таксама з'явілася новая алея, праўда, перавагу ў гэтым рэгіёне аддалі бэзу.
У Віцебску ж алея з сімвалічнай лічбай 70 у назве была закладзеная ў год 70-годдзя вызвалення Беларусі. І сёння, можна сказаць, сустракала ўдзельнікаў суботніка як гасцей на сваім першым дні нараджэння. Адначасова праца кіпела на знакавым мемарыяле "Прарыў" ва Ушацкім раёне і адразу на двух памятных комплексах у Полацкім.
У Брэсцкім рэгіёне традыцыйна галоўны герой суботнікаў - Брэсцкая крэпасць. Акрамя таго, што мемарыял у цэлым прывялі ў парадак пасля зімы, ля Паўночных варот сёння яшчэ з'явіўся і рабінавы сквер.
А моладзь у гэты час пракладвала оптавалакновы кабель да патрыятычнага цэнтра, што будуецца ў крэпасці. Як гаварылі самі хлопцы, натхненне ў іх сёння асаблівае. Бо, як вядома, частка сродкаў, заробленых падчас гэтага суботніка, пойдзе як раз на будаўніцтва цэнтра ў Брэсцкай крэпасці. А гэта значыць, наблізіць момант з'яўлення ў нашай краіне абсалютна новай пляцоўкі для піянерскіх злётаў і міжнародных маладзёжных форумаў. Пэўная частка грошай, заробленых намі, беларусамі, адправіцца на аднаўленне мемарыялаў і помнікаў Вялікай Айчыннай. Па-іншаму ў такі сімвалічны для краіны год проста быць не можа. Але ўсё ж асноўную частку суботняга заробку ўсёй краіны інвесціруюць у здароўе самых маленькіх беларусаў. Удыхаючы сёння новае жыццё ў помнікі Перамогі, паркі і скверы, кожны з нас па сутнасці даў шанц нейкаму дзіцяці зрабіць першы ў жыцці ўдых: каля 80-ці сучасных апаратаў штучнай вентыляцыі лёгкіх для нованароджаных за сродкі, заробленыя падчас суботніка, закупяць ужо сёлета.
