На працягу тыдня сіноптыкі прагназуюць парывісты вецер і моцныя ападкі. Дзяржаўтаінспекцыя ўжо гатовая перайсці ва ўзмацненне і гарантаваць бяспеку на дарогах пры любых умовах.
Станіслаў Салавей, старшы інспектар па асаблівых даручэннях УДАІ МУС Беларусі: "У сувязі з выпадзеннем ападкаў Дзяржаўтаінспекцыя маніторыць сітуацыю па краіне і ў выпадку ўзнікнення неабходнасці ўводзіць план "Надвор'е". Пасля ўвядзення гэтага плана праца ДАІ скіравана на тое, каб аказаць дапамогу дарожным службам, грамадзянам, якія аказаліся ў складанай сітуацыі. А самі ўдзельнікі дарожнага руху павінны разумець, што імгненна прыбраць снег немагчыма, пра сваю бяспеку трэба паклапаціцца самім. Вадзіцелям неабходна захоўваць бяспечную хуткасць".
Капрызы прыроды ўплываюць і на сітуацыю на дарогах. Сёння ноччу каля Гродна адбылося лабавое сутыкненне. Паводле папярэдняй інфармацыі, вадзіцель "жыгулёў" не справіўся з кіраваннем і выехаў на паласу сустрэчнага руху. У выніку магутнага ўдару пасажыр ВАЗа шпіталізаваны ў цяжкім стане, вадзіцель памёр у бальніцы. Як паведамляюць у ДАІ, мужчына не быў прышпілены рамянём бяспекі. Дарожная міліцыя высвятляе акалічнасці смяротнага ДТЗ.
