У самазанятых з'явіцца права на атрыманне пенсіі. Такую магчымасць замацаваў Указ "Аб дзяржаўным сацыяльным страхаванні". Дакумент, у прыватнасці, закранае інтарэсы дзясяткаў тысяч плацельшчыкаў адзінага падатку. Указам таксама вызначана, што індывідуальныя прадпрымальнікі, натарыусы і адвакаты могуць выплачваць узносы ў Фонд сацыяльнага страхавання толькі за перыяд фактычнага ажыццяўлення сваёй дзейнасці з атрыманнем даходу. Усе падрабязнасці ў матэрыяле Вікторыі Антоненкавай.
Самазанятыя грамадзяне могуць выплачваць узносы на пенсіённае страхаванне
Планаваць сваю будучыню ўжо сёння. Самазанятыя грамадзяне могуць выплачваць узносы на пенсіённае страхаванне. Памер адлічэння - 29 % ад мінімальнай заработнай платы, гэта амаль 96 рублёў. Узносы выплачваюцца на добраахвотнай аснове, пры гэтым можна выбраць форму ўнясення выплат - штомесячную альбо за год.
Такім чынам, у самазанятых асоб з'явіцца права на пенсію пры дасягненні пенсіённага ўзросту, інваліднасці, страце кармільшчыка. Зараз працоўную пенсію можна атрымаць пры наяўнасці 17-гадовага страхавога стажу, да 2025 года ён павінен скласці 20 гадоў. Беларусы, якім не ўдалося напрацаваць неабходны страхавы стаж, могуць аформіць сацыяльную пенсію. Зараз яе атрымліваюць больш за 3,5 тысячы чалавек.
Наталія Паўлючэнка, кіраўнік Фонда сацабароны насельніцтва Міністэрства працы і сацабароны Беларусі:
"Важны памер аплаты ўзносаў. Мы не гаворым, што гэта абавязкова павінна быць мінімальная заработная плата. Па магчымасці, гэта павінна быць больш. Чаму? Таму што калі ты выплачваеш узносы 20 гадоў з мінімальнай заработнай платы, твая працоўная пенсія складзе 216 рублёў. У тых грамадзян, якія не сфарміравалі свой працоўны стаж, на сённяшні дзень памер сацыяльнай працоўнай пенсіі - гэта 50 % ад бюджэту пражытачнага мінімуму: 107 рублёў".
ІП, адвакаты змогуць дэклараваць перыяды, у якія яны не працавалі, і не выплачваць за гэты час узносы на сацстрахаванне
А вось індывідуальныя прадпрымальнікі, адвакаты і натарыусы змогуць дэклараваць перыяды, у якія яны не працавалі, адпаведна і не выплачваць за гэты час узносы на сацыяльнае страхаванне. Часовае спыненне дзейнасці неабходна пазначыць у форме персаніфікаванага ўліку. Дакумент з'явіцца не пазней за 1 сакавіка на сайце Фонду сацыяльнай абароны насельніцтва. Уладальнікі электроннага лічбавага подпісу запаўняюць форму анлайн, таксама яе можна запампаваць. Падпісаны бланк трэба прынесці ў орган ФСАН па месцы жыхарства.
Ніна Грабар, начальнік упраўлення Фонду сацабароны насельніцтва Міністэрства працы і сацабароны Беларусі:
"Самазанятыя асобы ў нас з гэтага года становяцца на ўлік, адпаведна выплачваць і падаваць формы яны будуць на працягу 2019 года і ў 2020 годзе. А па індывідуальных прадпрымальніках, адвакатах і натарыусах нічога не змянілася па выплаце ўзносаў. Іх абавязковай умовай стала запаўненне дакументаў персаніфікаванага ўліку".
Суму ўзносаў можна падлічыць на калькулятары
Суму ўзносаў можна падлічыць на калькулятары на сайце ФСАН. У выпадку ажыццяўлення дзейнасці на працягу ўсяго года мінімальная выплата складзе амаль 1.300 рублёў. Супрацоўнікі фонду гатовыя аказаць дапамогу ў растлумачэнні парадку і сумы выплат.
