Зараз аграрыі актыўна ўбіраюць капусту. Сёлета ў цэнтральным рэгіёне ўраджай белакачаннай складзе каля 10 тысяч тон.
Наш карэспандэнт Аляксандр Харавец разам з аграрыямі паспрабаваў сябе ў няхітрай навуцы - рубцы капусты.
Другі тыдзень брыгада Анатоля Лічуўскага ўбірае капусту з палёў Мінскай вобласці. Ручная праца няпростая - але таго вартая. За дзень работнікі атрымліваюць каля 400 тысяч рублёў. У калектыве выпрацавалі нават свае правілы: хто менш за ўсіх зрэжа качаноў - той на абед мые посуд. Таму ўсе стараюцца. А Максім нават мае сваю аўтарскую тэхналогію.
Сёлета у гаспадарцы Усход пад капусту адвялі каля 20 гектараў. Тут вырошчваюць як раннія гатункі, так і познія. Нягледзячы на засушлівае лета, сярэдняя вага аднаго качана каля кілаграма.
5-тонны прычэп брыгада з 9 чалавек загружае за 30 хвілін. За працоўны дзень з поля ўбіраецца каля 50 тон капусты. Атрымліваецца, што ў сярэднім адзін чалавек за рабочую змену збірае каля дзвюх тон гародніны.
На капусце ў гаспадарцы плануюць зарабіць каля двух мільярдаў рублёў. Прычым уся гародніна адпраўляецца на прылаўкі сталічных магазінаў.
Набыць жа карысную і сакавітую прадукцыю па прымальных цэнах можна як у магазінах, так і на восеньскіх кірмашах. Яны, дарэчы, праходзяць кожныя выхадныя ва ўсіх раёнах сталіцы.
