Выбраўшы прафесію, яны выбралі Беларусь. Тысячы іншаземцаў-выпускнікоў сёлета атрымаюць дыпломы ВНУ нашай краіны. У гэтыя дні ў маладых спецыялістаў праходзяць выпускныя балі. На святочным вечары ў БДУ пабывала Дзіяна Равякова.
Амаль 4 тысячы кіламетраў для туркменкі Зохры Алабердыевай чарговы раз не сталі перашкодай. Яна прызнаецца: для гэтай паездкі нагода, бадай, самая важкая - у дачкі выпускны баль. Пяць гадоў таму яны разам выбралі факультэт міжнародных адносін Беларускага дзяржуніверсітэта, каб у будучыні Ляле стала дыпламатам.
Доўгія сукенкі і фракі замест дзелавых убораў. Нягледзячы на тое што гэта быў будны дзень, паўсядзённы дрэс-код у Ліцэі БДУ ніхто не выконваў. Па традыцыі менавіта ў яго сценах прайшоў выпускны баль для замежных студэнтаў вядучай ВНУ Беларусі, якіх, дарэчы, з кожным годам у БДУ становіцца ўсё больш.
Сяргей Абламейка, рэктар БДУ: "Гэта суадносіны цаны і якасці. Заўсёды глядзіцца, каб якасная адукацыя была, але і недарагая. У цэлым вучацца з 50-ці краін, гэта значыць у нас вучыліся ў навучальным годзе 2 500 іншаземных студэнтаў".
Часцей за іншых па дыпломы аб вышэйшай адукацыі ў нашу краіну едуць абітурыенты з Кітая, Туркменістана, Казахстана і Расіі. У прыярытэце ў іх спецыяльнасці, звязаныя з міжнароднымі адносінамі, эканомікай, культурай і геаграфіяй.
Сёлета толькі дыпломы БДУ атрымалі амаль 700 замежных студэнтаў. У цэлым жа па краіне выпускнікамі-2017 нашых ВНУ сталі звыш 6 тысяч іншаземцаў.
