Пра тое, як тэлевізійная карцінка здольная злучыць у адзінай малітве вернікаў не толькі з усёй краіны, але і свету, рэпартаж Вольгі Маслоўскай.
Для ўсіх хрысціянскіх канфесій Вялікдзень - самае галоўнае і чаканае свята. Сёлета праваслаўныя і католікі ўсяго свету адзначаюць яго ў адзін дзень - 20 красавіка. Падзея радасная, бо Уваскрэсенне распятага на крыжы Ісуса Хрыста - гэта перамога жыцця над смерцю, святла над цемрай. Святу папярэднічаў Вялікі пост. Вялікдзень вернікі сустракаюць са светлымі думкамі і спадзяваннямі.
Галоўнае набажэнства літургічнага года - у прамым эфіры. Сёння католікі Беларусі будуць маліцца разам з вернікамі Віцебска.
Відэакамеры ўсталяваныя ў кафедральным касцёле Ісуса Міласэрнага. Гісторыя храма пачалася ў 2009 годзе, а ў 2011-м па жаданні Папы Бенядзікта XVI святыні быў дадзены статус кафедральнага касцёла Віцебскай епархіі.
Чакаецца, што сёння пад скляпеннямі храма збяруцца паўтысячы вернікаў.
Дзякуючы магчымасцям спадарожнікавага канала Беларусь 24, трансляцыю з Віцебска змогуць паглядзець не толькі ў Беларусі, але каталікі Расіі, усёй Еўропы, Лацінскай Амерыкі.
Сёлета Віцебская каталіцкая епархія адзначае 15-годдзе з дня заснавання. Адметна, што яе ўзначальвае самы малады біскуп у Беларусі. Алегу Буткевічу 41 год, ён нарадзіўся ў Браславе ў каталіцкай сям'і. Дзве родныя сястры біскупа таксама прысвяцілі сваё жыццё служэнню Богу - сталі манашкамі. У сан ён быў пасвячоны ўсяго тры месяцы таму.
Зараз ідзе апошняя падрыхтоўка да прамой трансляцыі з Віцебска. Да пачатку імшы вернікі асвячаюць святочныя стравы - перш за ўсё фарбаваныя яйкі і здобныя кулічы. Гэты абрад складаецца з асаблівых малітваў і акраплення святой вадой. Ужо раніцай увесь праваслаўны свет абляціць вестка Хрыстос Уваскрос!.
