Сёння "Цягнулі Каляду на дуба"
21 студзеня ў Новінскім доме культуры заўсёды гучна і весела. Штогод мясцовыя жыхары збіраюцца разам, каб правесці аўтэнтычны абрад «Цягнуць Каляду на дуба». Вось так выглядае галоўны атрыбут свята - Каляда. Гэта лялька з жытняга снапа, якую паставілі на кола. Зараз яе ўпрыгожваюць, а затым праз усю вёску павязуць да дуба. Тым часам на ганку гаспадыні бяруць старыя венікі і сякерай высякаюць ўсе грахі. Пасля гэтага на вуліцу выносяць Каляду і ўсаджваюць яе на сані. Праўда, у гэтым годзе яны імправізаваныя, на колах.
Дружнае шэсце ідзе да адзінокага стагадовага дуба за некалькі кіламетраў ад вёскі. Нежанатыя хлопцы здымаюць з дрэва леташнюю Каляду і спальваюць яе. А потым на дуб зацягваюць куццю ў чыгунку і новую ляльку. Старадаўні абрад у гэтым кутку Мінскай вобласці не проста частка мясцовага жыцця, але і сапраўднае тэатралізаванае шоу. Да каларытнага свята далучаюцца і іншыя жыхары Беларусі.
Праводзіны калядных свят
Абрад аднавілі ў 1998 годзе. Дагэтуль старажытныя традыцыі ў памяці захоўвала Ніна Клімовіч. Яна ж і стала прадаўжальніцай культуры продкаў.
Зацягнуўшы Каляду на дуб, усе вяртаюцца ў вёску. Музыканты іграюць на народных інструментах, калядоўшчыкі спяваюць і танцуюць, праводзяць народныя гульні. Мясцовыя жыхары лічаць, што калі абрад правесці па ўсіх правілах, то будзе добры ўраджай.
Праводзіны калядных свят сталі своеасаблівым брэндам вёскі Новіны. Абрад уключылі ў Дзяржаўны спіс гісторыка-культурных каштоўнасцей Беларусі.