Такога халоднага мая не было ў Беларусі каля 30 гадоў

10 Мая 2017

Тэмпература б'е рэкорды. Снежныя кадры актыўна абнаўляюцца ў сацыяльных сетках. Мабыць, самае папулярнае фота сёння - кветкі пад снегам. Гучыць, вядома, прыгожа. Але для аграрыяў такія карціны далёка не маляўнічыя - надвор'е сур'ёзна ўдарыла па ўраджаі. Зрэшты, холадна не толькі на вуліцы, але і ў дамах. Ацяпленне ўжо адсутнічае, а вось што будзе з графікам адключэння гарачай вады і калі ў Беларусь вернецца цяпло - адказы шукаў Аляксандр Харавец.

Паспрабаваць чарэшню і вішню са свайго сада сёлета ў беларусаў ужо ці наўрад атрымаецца - упэўнены Павел Шашко. Паводле слоў навукоўца, асноўная праблема нават не ў такіх рэзкіх пахаладаннях і снезе - ён хутка растае. А ў ранняй вегетацыі пладовых дрэў. Прырода прачнулася яшчэ ў сакавіку. Дрэвы выйшлі са стану супакою і прыняліся рыхтавацца да цвіцення. Але глеба апынулася слаба прагрэтай.

Павел Шашко, загадчык доследнага поля Гродзенскага дзяржаўнага аграрнага ўніверсітэта: "На зямлі тэмпература каля мінус 4. Такая тэмпература з'яўляецца крытычнай для некаторых костачкавых парод. Яблыкі знаходзяцца ў фазе бутанізацыі - кветкі ў такой форме пашкоджваюцца пры тэмпературы ніжэй за мінус 8. Нашы сарты. Імпартныя сарты пры мінус 6-8".

"Нічога незвычайнага, проста май, і зіма, нарэшце, вырашыла пазнаёміцца з летам". Такія каментарыі сёння беларусы пакідаюць у сацыяльных сетках, дзе дзеляцца ўражаннямі аб надвор'і за акном. Такі халодны май могуць успомніць хіба што нашы дзядулі і бабулі. 72 гады таму надвор'е прымусіла беларусаў дастаць з шафы зімовы гардэроб.

Халоднае прывітанне ад прыроды даляцела і да сталіцы Расіі. Надвор'е ўнесла карэкціроўкі ў працу маскоўскіх аэрапортаў. У сувязі са снегападам і дрэннай бачнасцю мясцовыя авіягавані перайшлі на зімовы рэжым працы. Аэрадромы і паветраныя судны зноў праходзяць усе неабходныя апрацоўкі па зімовых стандартах абслугоўвання. Нягледзячы на складаныя ўмовы надвор’я, маскоўскія аэрапорты працягваюць працаваць у штатным парадку.

Снег кружыцца, лятае і сярод квітнеючых садоў і зялёнага лісця растае. У такое надвор'е камфортна сябе адчуваць могуць толькі тыя беларусы, якія не паспелі змяніць свой зімовы гардэроб на летні. Згодна з прагнозамі сіноптыкаў такое надвор'е будзе яшчэ як мінімум да канца тыдня.

Зрэшты, холадна не толькі на вуліцы, але і ў дамах. Апошнімі батарэі пахаладзелі ў Мінску яшчэ ў пятніцу, і, паводле словах камунальшчыкаў, ацяпленне не ўключаць, але і ваду гарачую адключаць раздумалі. Планавы рамонт цепласетак перанеслі.

Грэцца пад гарачым душам, згодна з прагнозамі сіноптыкаў, прыйдзецца і на наступным тыдні. Трохі пацяплее толькі на выхадных. І на змену майскім завеям прыйдуць дажджы з навальніцамі. А з панядзелка зноў халады. Медыкі ж рэкамендуюць не паддавацца пераменліваму настрою надвор'я, і апранацца больш цёпла. Інакш паходаў у аптэку не пазбегнуць.