Дольшчыкі дома, што будуецца ў Мінскім раёне, адклалі наваселлі на нявызначаны тэрмін. Рэч у тым, што здача іх дома пераносілася ўжо чатыры разы. Чарговы ўвод аб'екта ў эксплуатацыю быў прызначаны на сёлетні лістапад. Але мяркуючы па тым, як сёння праходзяць будаўнічыя работы, рабіць рамонт у сваіх кватэрах навасёлы будуць яшчэ не хутка. Зараз дом пабудаваны ўсяго на 36 працэнтаў. Каб актывізаваць будаўніцтва, у сакавіку Камітэтам дзяржкантролю была праведзена рабочая нарада з удзелам усіх зацікаўленых бакоў.
Аб прынятых мерах, якія павінны пакласці канец даўгабуду, і чаму звычайны жылы дом будуецца незвычайна доўга, раскажа Юрый Шаўчук. Гэтая гісторыя з даўгабудам у пасёлку Юбілейны Мінскага раёна працягваецца ўжо 5 гадоў. Менавіта столькі вайскоўцы, міліцыянеры, супрацоўнікі МНС і 13 шматдзетных сем'яў будуюць свае кватэры. Нягледзячы на тое што грошы на рахунак забудоўшчыка паступаюць спраўна, будаўнічыя работы стаяць практычна на месцы.
Аляксандр Друцько, дольшчык: Штомесяц пералічваем вялікія сумы грошай. 22 мільярды было пералічана ў 2012 годзе і 5 мільярдаў са студзеня 2013 года. Дзе грошы, я не ведаю.
За той час, пакуль узводзіцца дом, кошт жылога метра для жыхароў вырас ужо ў два разы - з 3 да 6 мільёнаў рублёў. А тэрміны здачы аб'екта пераносіліся і зусім чатыры разы. Чарговы тэрмін здачы запланаваны на лістапад. За 5 гадоў дом пабудаваны на 36 працэнтаў. Для таго каб будаўніцтва было скончана поўнасцю, сюды яшчэ трэба ўкласці 60 мільярдаў рублёў. Але праблема нават не ў гэтым - грошы ёсць, няма рабочай сілы, і таму будаўніцтва стаіць на месцы. З сакавіка па распараджэнні Камітэта дзяржкантролю колькасць будаўнікоў на аб'екце павінна была павялічыцца да 50 чалавек. Але, па словах будучых жыхароў, зараз тут працуе менш чым 20 рабочых. А для таго каб дом быў здадзены своечасова, колькасць будаўнікоў і зусім павінна вырасці мінімум у 10 разоў.
Станіслаў Пузіноўскі, начальнік аддзела Камітэта дзяржкантролю Мінскай вобласці: Камітэт дзяржкантролю сабраў нараду, вызначыў тэрміны, вызначыў кантрольныя мерапрыемствы па будаўніцтва гэтага дома, прызначыў адказных па кожным мерапрыемстве.
Тое, як выконваюцца даручэнні, супрацоўнікі Камітэта дзяржкантролю правераць у чэрвені. Разам з тым згода паміж усімі зацікаўленымі бакамі сёння так і не дасягнута, што і стварае пагрозу для чарговага зрыву ўводу дома ў эксплуатацыю.
Сяргей Парменаў, генеральны дырэктар арганізацыі-забудоўшчыка: Асноўная праблема заключаецца ў крыніцах фінансавання. За 5 месяцаў было прафінансавана ўсяго 4 мільярды. Калі заказчыкам не будзе забяспечана фінансаванне, то дом пры ўсіх нашых намаганнях не зможа быць уведзены ў нарматыўныя тэрміны.
Тыя грошы, якія з пачатку года пералічаны на рахунак забудоўшчыка, яны ўжо асвоілі. Толькі ўсё роўна незразумела, як ва ўпраўленні капітальнага будаўніцтва размяркоўвалі сродкі на працягу пяці гадоў. Адказ на гэтае пытанне мы так і не атрымалі. Пры гэтым субпадрадныя арганізацыі пачалі сантэхнічныя і электрамантажныя работы. Для гэтага Беларусбанк у красавіку выдзеліў больш за 700 мільёнаў рублёў. Праз месяц ужо стане зразумела, ці дапамагло ўмяшанне кантралюючых органаў у вырашэнне гэтага пытання.
