Вартавыя парадку працягваюць падрыхтоўку да правядзення II Еўрапейскіх гульняў

Іх задача - гарантаваць бяспеку гасцей і спартсменаў,  узяць на кантроль дарожнае становішча падчас міжнароднага спартыўнага форуму. Да якіх сітуацый гатовыя праваахоўнікі - даведаемся ў Лізаветы Лакоткі.

Каб II  Еўрапейскія гульні прайшлі не толькі маляўніча, але і спакойна, да падзеі рыхтуюцца і сілавыя ведамствы. Бяспеку на форуме будуць гарантаваць тысячы беларускіх праваахоўнікаў. Калі спатрэбіцца, у сталіцу прыедуць супрацоўнікі з рэгіёнаў. 

Сёння сілавікі сочаць за бяспекай у акваторыі Заслаўя. Тут праходзіць тэставы турнір па веславанні на байдарках і каноэ да II Еўрапейскіх гульняў. Па выніках заездаў трэнер адбярэ экіпажы, якія прадставяць нашу краіну на спартыўным форуме. 

А задача праваахоўнікаў - забяспечыць ахову грамадскага парадку, кантраляваць перыметр аб'екта, а таксама шукаць забароненыя прадметы. Напрыклад, сёння адпрацоўвалі сітуацыю, калі ў аднаго з наведвальнікаў знайшлі нож.

Вяслярны канал - самы далёкі пункт II  Еўрапейскіх гульняў. Адлегласць ад Мінска - 27 кіламетраў. Даўжыня воднай роўнядзі 2150 метраў. Тут веславанне на байдарках і каноэ будзе праходзіць на 9-ці дарожках. Спаборніцтвы ў Заслаўі будуць праходзіць тры дні, разыграюць 16 камплектаў узнагарод.

Інфармацыя пра тое, колькі сілавікоў будзе працаваць на аб'ектах, сакрэтная. Аднак праваахоўнікі пераконваюць, што гэтай колькасці хопіць, каб гарантаваць бяспеку.