На клумбах матывы слуцкіх паясоў, а на вуліцах велічныя зубры, лісяня Лесік і шахматныя фігуры з дэкаратыўнай дошкай. Сталічныя азеляняльнікі пачалі падрыхтоўку да сустрэчы гасцей II Еўрапейскіх гульняў. У найбліжэйшы час майстры павінны высадзіць больш за 2 мільёны кветак і выставіць 11 тысяч кашпо. Прыгажосці вуліцам дадасць і незвычайная ілюмінацыя. Вуліцы Кірава і Ульянаўскую падчас форуму ўпрыгожаць 60 эмблем стадыёна і фігуры спартсменаў. Ля Палаца спорту, на вуліцы Прытыцкага і на Партызанскім праспекце святочную спартыўную ілюмінацыю таксама значна дапоўняць.
Пра спартыўнае ўбранне горада сюжэт Наталлі Кезік. Першым гасцей спартыўнага форуму сустрэне талісман II Еўрапейскіх гульняў – Лесік. Вось такія трохметровыя фігуры вітаюць балельшчыкаў на англійскай і беларускай мовах на ўсіх уездах у сталіцу. Над спецыяльнай канструкцыяй лісяня дызайнеры працавалі амаль паўгода. І ў іх атрымалася цалкам перадаць колеры спартыўнага адзення і характар.
А непадалёк ад галоўнага стадыёна II Еўрапейскіх гульняў убачыць можна і адзін з сімвалаў Беларусі – велічных зуброў. Магутных жывёлін можна не толькі ўбачыць, але і зрабіць сэлфі.
Папараць-кветка, дыямент з блакітных камянёў і лагатып спартыўнага форуму ўжо квітнеюць уздоўж буйных сталічных аўтамагістраляў. А ў чэрвені фларыстычныя кампазіцыі са свежых кветак упершыню адправяцца ў свабоднае плаванне па воднай роўнядзі сталічных вадаёмаў.
Новыя фотазоны і адмысловыя лакацыі для адпачынку з'явяцца ў кожным раёне сталіцы. Так, на вуліцы Багдановіча ўжо можна згуляць у зялёныя шахматы на чорна-белай дошцы, загадаць жаданне ля дрэва шчасця ў Камароўскім скверы. На клумбах сёлета беларуская гісторыя: арнамент, птушкі і матывы слуцкіх паясоў.
Дарогу да стадыёна “Дынама” падкажуць яркія светлавыя эмблемы і выявы спартсменаў. Зараз ідзе мантаж 60 арт-кампазіцый. Даведнікам для турыстаў паслужаць і яркія шары з эмблемай II Еўрапейскіх гульняў. 8 светлавых фігур можна сустрэць ля стадыёнаў, на вакзале і на ўездах у сталіцу.
Астатнія галоўныя пляцоўкі спартыўнага форуму – праспекты Пераможцаў і Дзяржынскага, вуліца Прытыцкага - таксама зазіхацяць больш ярка. Там да ілюмінацыі, якая ўжо ёсць, дададуць яркіх агеньчыкаў і матываў з беларускім акцэнтам.
Сталічныя азеляняльнікі пачалі падрыхтоўку да сустрэчы гасцей II Еўрапейскіх гульняў
18 мая 2019