Адразу некалькі стыхійных бедстваў у Жодзіне. Моцны ўраган выкінуў на дарогу некалькі дрэў і заблакіраваў аўтобус са школьнікамі, а дах цэнтральнага гандлёвага цэнтра - пад пагрозай абвальвання. На шчасце, гэта толькі сцэнарый вялікіх вучэнняў, якія правялі гарадскія службы. Ратавальнікі, медыкі, Дзяржаўтаінспекцыя і камунальнікі адпрацоўвалі ўзаемадзеянне ў максімальна складаных умовах.
Жодзінскі раён на тры дні стаў трэніровачнай пляцоўкай для процістаяння гарадскіх службаў надзвычайным сітуацыям. Такія маштабныя вучэнні ў кожным раёне Мінскай вобласці праводзяць кожныя 7 гадоў.
Расказвае Ян Пашкевіч.
Пакуль камунальныя службы ачышчаюць праезд для медыкаў, ратавальнікі ўжо вызначылі самую небяспечную зону вакол аўтобуса. Нечаканае ўзгаранне паліва прадухіліць спецыяльная пена.
На абочыне разгарнулі і палявы шпіталь: пасля хуткага агляду дзеці атрымліваюць не толькі дыягназ, але і неадкладнае лячэнне. Тут жа пацыентаў размяркоўваюць па ступені цяжкасці траўм.
Суаўтарам складанага сцэнарыя для вучэнняў стаў нядаўні моцны шторм у Смалявічах. Тады драўляныя барыкады перакрылі многія дарогі вобласці. Умовы ж трэніровачнага краш-тэсту для гарадскіх службаў – на максімальным узроўні складанасці.
Для самых цяжкіх пацыентаў на месцы здарэння побач з некалькімі брыгадамі хуткай дапамогі працуе і сучасны рэанімабіль.
У трэніровачным графіку гарадскіх службаў – прадухіленне яшчэ адной надзвычайнай сітуацыі. Праз магчымасць абвальвання даху ў буйным гандлёвым цэнтры экстранна эвакуіравалі ўсіх наведвальнікаў.
Побач з ратавальнікамі працуюць і іншыя службы горада: газавая бяспека, медыкі, санітарныя дружыны. Такім чынам, усе адказныя спецыялісты практыкуюцца дапаўняць адно аднаго ў самай складанай сітуацыі.
