Гідролагі і супрацоўнікі МНС манітораць сітуацыю кругласутачна. Пакуль яна спакойная. Малая колькасць снегу паводак не абяцае. А вось талыя воды з Расіі могуць значна падняць узровень вады ў беларускіх рэках.
Вясновае пацяпленне вымушае быць пільнымі і рыбакоў, праўда, халатнае стаўленне да мер бяспекі ўсё ж прыводзіць да трагедыі. Так, на возеры Чорным трое мужчын падчас рыбалкі загінулі, праваліўшыся пад лёд, яшчэ аднаго даставілі ў бальніцу.
Як рыхтуюцца сустрэць паводку на Палессе - даведалася Ганна Кавалёва.
Схема дзеянняў экстранных службаў распісана да дробязяў. Зараз галоўнае - адпрацаваць тэхніку і быць гатовымі да любой паводкавай сітуацыі: ад эвакуацыі людзей і дапамогі пацярпелым да тушэння пажараў у затопленых пасёлках, куды наземная тэхніка проста не зможа дабрацца.
У Гомельскай вобласці ўжо сфарміравана парадку 20 зводных атрадаў. Іх задача - рэагаваць на паводкавыя надзвычайныя здарэнні. Маніторынг кругласутачны.
Асаблівая ўвага да рэк, якія мінулай вясной прымусілі пахвалявацца. Сярод іх - Харопуць у горадзе Добруш. Найбліжэйшыя дамы яна падтапіла толькі трохі, а вось участкі амаль цалкам пайшлі пад ваду. У эпіцэнтры тады апынуліся 85 падворкаў і 75 дзяржбудынкаў. Сярод іх і ўладанні сям'і Тамары і Уладзіміра Еланковых.
Яшчэ адна артэрыя - Іпуць - віхляе па ўсім Добрушы. Звычайна яна і прыносіць талыя воды з Расіі. Таму падрыхтоўка да паводкі тут заўсёды сур'ёзная. Зараз спецыялісты ўмацоўваюць берагі, што прылягаюць да аўтатрас. Тоны пяску вязуць для ўмацавання дамбаў. А пасля леташніх разводдзяў Харопуці нават зрабілі водаадводны канал, каб гэтай вясной надзвычайныя сітуацыі для мясцовых жыхароў звесці да нуля.
Руку на пульсе трымаюць і добрушскія гідролагі. Кожны дзень - абавязковыя замеры ўзроўню вады. Параўнанне з паказчыкамі папярэдняга дня і адпраўка інфармацыі зацікаўленым службам, у тым ліку і ратавальнікам.
Сіноптыкі абнадзейваюць: снегу не так шмат, а значыць, сёлета варта чакаць паводкі без сур'ёзных падтапленняў.
Гэты населеных пункт - традыцыйна ў групе рызыкі, як шэраг іншых па берагах Прыпяці. У тым ліку Мазыр, Петрыкаў і Жыткавічы. Пакуль да небяспечных адзнак узроўню вады далёка. Калі ж пачнуцца моцныя ападкі, сітуацыя зменіцца ў корані. Сур'ёзны рост узроўню вады можа справакаваць і пацяпленне ў Расіі. Адтуль талыя воды прыйдуць і ў беларускія рэкі. Тады магчыма, адпрацаваныя навыкі ратавальнікам прыйдзецца прымяняць ужо на практыцы.
