Попыт на арэнду электрасамакатаў і веласіпедаў вырас у некалькі разоў

Попыт на арэнду экадэвайсаў (электрасамакатаў і веласіпедаў) у гэтым сезоне вырас у некалькі разоў. Пакуль у сталіцы пракат ажыццяўляюць два сэрвісы. Новую тэндэнцыю плануе падтрымаць і завод "Мотавела" - на прадпрыемстве ўжо рыхтуюць партыю двухколавых. Гадзіну арэнды абяцаюць па цане талончыка. Аб пашырэнні геаграфіі двухколавых сэрвісаў  распавядзе Ілья Цвяткоў. 

Ідэя развіваць байкшэрынг у Мінску Вадзіму Осіпчыку прыйшла год таму  пасля чарговай паездкі ў Еўропу. Там ён выпрабаваў анлайн-сэрвіс па кароткатэрміновай арэндзе веласіпедаў. Больш за ўсё прадпрымальніку спадабалася зручнасць і прастата паслугі. Ніякіх строгіх абмежаванняў па часе і складаных працэдур браніравання байка. Усё, што трэба,  - гэта запампаваць дадатак і аплаціць паездку.

Вадзім Осіпчык, дырэктар кампаніі па пракаце веласіпедаў: "Адрозненне яго ад звычайнага пракату заключаецца ў тым, што вам не трэба ставіць веласіпед там, дзе вы яго ўзялі. Г.з. вы бераце яго ў тым месцы, якое можна знайсці па дадатку на карце, падыходзіце да найбліжэйшага вольнага веласіпеда, сканіруеце QR-код, тым самым разблакуеце  замок і можаце выкарыстоўваць веласіпед. Праязджаеце колькі вам трэба і пакідаеце веласіпед побач з домам. Галоўнае, каб ён не перашкаджаў праезду транспарту і іншым людзям".

Рубель  за паўгадзіны электроннай арэнды. Камплектацыя  поўная: пярэднія і заднія ліхтары, катафоты і кошык для рэчаў. І самы галоўны аксесуар - трымальнік для смартфона. 

Вопыт байкшэрынгавай індустрыі беларускія прадпрымальнікі перанялі ў суседзяў. Напрыклад, у Маскве арэнда веласіпедаў папулярная не першы год. У пракат двухколавыя здаюць чатыры сэрвісы. Пры гэтым браніраваць экатранспарт можна не толькі штохвілінна, прадугледжаны абанементы на суткі, месяц і нават на цэлы сезон. Аднак, як правіла, пакідаць іх прыходзіцца на спецыяльных стаянках. Па ўсім горадзе  некалькі сотняў электрапарковак. 

Ездзіць на байках можна з камфортам, але ўсё ж прыходзіцца працаваць нагамі. А для тых, хто не любіць круціць педалі, у арэнду можна ўзяць гаджэты з электраматорам. Кікшэрынг - так называюць бесстаяначны пракат самакатаў.

Каб арандаваць вось такі электрасамакат, трэба выканаць некалькі простых дзеянняў. Для пачачку, зразумела, запампаваць бясплатны дадатак. Далей знайсці на віртуальнай карце найбліжэйшы самакат. Націснуць на яго, тут мы бачым, колькі ў ім засталося зараду. Наступнае дзеянне - сканіраванне QR-кода. Сканіруем і можна адпраўляцца ў дарогу.

Такі транспарт выдатна падыдзе для язды на кароткія адлегласці ў межах кальцавой. Хуткасць абмежаваная да 25 кіламетраў за гадзіну  для бяспекі, а запас ходу ў гаджэта 20 кіламетраў без падзарадкі батарэі. 

Уладзімір Галуза, начальнік дыспетчарскай службы сэрвісу па пракаце электрасамакатаў: "Зараз мы выраслі ўжо ў 7 разоў. Па Мінску ў нас ужо каля 700 самакатаў. У найбліжэйшы час перспектыва наступная: мы пашыраем зону эксплуатацыі на Лошыцу і Каменную Горку. Мы бачым, што гэты сэрвіс становіцца запатрабаваным, людзям падабаецца. Таму ў наступным сезоне будзем адкрывацца і ў іншых абласных гарадах".

Карыстальнікам двухколавых засталося толькі навучыцца выконваць правілы эксплуатацыі. У Мінску экатранспарт калясіць ужо некалькі месяцаў, але дагэтуль некаторыя гараджане лічаць гаджэты безгаспадарнымі і імкнуцца забраць іх з сабою. 

Зусім хутка беларускі парк экадэвайсаў папоўніцца - запусцяць найбуйнейшы пракат электравеласіпедаў. Першая партыя экабайкаў ужо на падыходзе. Тарыфы будуць прывабнымі - усяго 15 капеек за хвіліну арэнды.