Новая сістэма аховы здароўя і ўнікальныя апараты айчыннай вытворчасці сёння былі прэзентаваныя на выставе ў Мінску. Спецыялісты з 17-ці краін абмеркавалі навінкі сусветнай медыцыны, у тым ліку ўнікальныя сімуляцыйныя комплексы беларускай вытворчасці і першы айчынны тамограф. Вядома, гаварылі і пра электронную сістэму аховы здароўя. Ужо ў наступным годзе звесткі аб гісторыі хваробы ўсіх жыхароў Мінска павінны быць перанесены ў анлайн-сістэму.
Больш падрабязна аб навінках медыцыны Юлія Грызунт.
Тут дэманструюцца сотні ўнікальных машын, аднак асаблівая ўвага сёння камп’ютарнай праграме, якая ўжо зусім хутка павінна літаральна перавярнуць уяўленне аб рабоце паліклінік. Медыцынская карта і рэцэпт з прыстаўкай "электронны" - гэта тое, што адбываецца ўжо зараз. А неўзабаве і ва ўсёй краіне дактары змогуць убачыць усе хваробы, шпіталізацыі і аналізы пацыента, проста набраўшы ў электроннай базе яго ідэнтыфікацыйны нумар.
Па словах спецыялістаў, пераход у анлайн дазволіць выключыць малаэфектыўныя візіты да ўрача. Дзякуючы электроннаму сэрвісу з'явіцца магчымасць маніторыць звесткі аб стане ўласнага здароўя. Акрамя таго, праз "асабісты кабінет" кожны беларус зможа выклікаць доктара або запісацца на прыём.
Таксама на форуме гаварылі пра новых універсальных спецыялістаў. Сёння ў Беларусі ўсяго каля тысячы ўрачоў агульнай практыкі. Але, па планах, хутка пачнецца перакваліфікацыя ўсіх тэрапеўтаў краіны.
А гэта яшчэ адна навінка. Першы тамограф беларускай вытворчасці. Унікальнасць машыны ў дакладнасці адлюстравання. На маніторы можна разгледзець кожны сасуд пацыента. Па планах, такія машыны з'явяцца ў нашых паліклініках ужо гэтым летам. Таксама на форуме працавала і шмат інтэрактыўных пляцовак.
На выставе дэманструецца шмат абсталявання для навучання будучых урачоў. Напрыклад, такі манекен унутры цалкам паўтарае чалавечы арганізм. На ім можна практыкаваць лапараскапічныя аперацыі. Знаходзіцца ён у сапраўднай аперацыйнай, якая, як і манекен, айчыннай вытворчасці. На працягу трох гадоў такія сімуляцыйныя комплексы павінны з'явіцца ва ўсіх беларускіх каледжах і ўніверсітэтах.
На форуме сустрэліся спецыялісты з 17-ти краін. Некаторыя з іх прыехалі, каб пазнаёміцца з беларускімі медыкамі. Бо мы вядомыя ў свеце як краіна, дзе праводзяцца практычна ўсе віды трансплантацый, для лячэння анкалогіі ў Беларусь прыязджаюць з усяго свету. Аперацыі праводзяцца з дапамогай органаў, створаных на 3D-прынтары, ну а ў некаторых умяшаннях ужо ўдзельнічаюць робаты.
