У спаборніцтвах прынялі ўдзел 23 каманды. Акцэнт - на ліквідацыі наступстваў хімічных аварый і ўзгаранняў на вытворчасці. Санітарныя дружыны - гэта людзі, якія ўмеюць аказваць першую дапамогу пацярпелым пры стыхійных бедствах і няшчасных выпадках на прадпрыемствах.
Падрабязней - Ілья Цвяткоў. З самай раніцы на тэрыторыі базы экатурызму ў Станькаве гучыць навучальная трывога. 23 санітарныя дружыны прадпрыемстваў Мінскай вобласці сёння адточваюць свае навыкі працаваць у экстрэмальным рэжыме. У кожнай камандзе хуткага рэагавання больш за 10 чалавек. Усе яны прайшлі спецыяльную падрыхтоўку на сваіх працоўных месцах і зараз правяраюць сілы на палігоне.
Спаборніцтвы ўключаюць пяць этапаў. Кожны з іх - адпрацоўка асноўных відаў надзвычайных сітуацый. Заклад поспеху - зладжанасць дзеянняў, тэарэтычныя веды і ўменне прымяніць іх на практыцы. У першую чаргу суддзі праверылі экіпіроўку ўдзельнікаў.
Вось гэта этап хімічнага заражэння. Першае, што трэба зрабіць, - гэта хутка вынесці пацярпелага з небяспечнай зоны, паставіць на зямлю і пачаць аказваць медыцынскую дапамогу.
Хуткасць рэакцыі адпрацавалі і падчас пошуку людзей на аварыйным аб'екце. Усе пацярпелыя, згодна са сцэнарыем, страцілі прытомнасць. Таму галоўная задача - аднавіць дыханне.
Да канца дня журы падлічаць усе балы. Лепшая каманда вобласці па выніках агульнага заліку праз некалькі месяцаў адправіцца прадстаўляць Мінскую вобласць на рэспубліканскім конкурсе.
