Беларускія дакументы аб перападрыхтоўцы, паслядыпломнай медыцынскай адукацыі, а таксама павышэнні кваліфікацыі будуць прызнавацца ў Расіі. Адпаведна, расійскія - у нашай краіне. Тэма ўзаемапрызнання медыцынскай адукацыі ў Саюзнай дзяржаве стала адной з ключавых на сумесным пасяджэнні калегіі Міністэрстваў аховы здароўя Беларусі і Расіі.
Зараз на тэрыторыі Саюзнай дзяржавы прызнаюцца толькі дыпломы аб вышэйшай медыцынскай адукацыі, але не выключана, што ўжо ў найбліжэйшы час, напрыклад, беларускі доктар, які прайшоў перападрыхтоўку, зможа без праблем уладкавацца на працу па новай спецыяльнасці і ў Расіі. Яшчэ адной тэмай дыскусіі сталі лекі, а, больш дакладна, экспарт і імпарт прэпаратаў у Саюзнай дзяржаве.
Васіль Жарко, міністр аховы здароўя Беларусі: "Пералік лекавых сродкаў, якія мы пастаўляем, вельмі вялікі. І на сённяшні дзень шматлікія пытанні, якія з'яўляліся перашкодай, таму што мы былі да гэтага года як вытворцы замежных дзяржаў, зараз нас прыраўналі. Гэта значыць, мы жадаем стварыць адзіныя ўмовы, адзіны рынак, каб ён быў сапраўды, і ў Саюзнай дзяржавы былі роўныя правы. Тое ж самае датычыцца і працягу роўных правоў у галіне адукацыі і аказання меддапамогі".
У планах - таксама стварэнне сумесных прадпрыемстваў па вытворчасці лекавых прэпаратаў. Абмеркавалі ў Мінску і даступнасць медыцынскіх паслуг на тэрыторыі дзвюх краін для грамадзян Саюзнай дзяржавы. Як было заяўлена, магчымасцяў атрымаць бясплатную медыцынскую дапамогу хутка можа стаць больш.
