У прамысловых маштабах вырошчваннем бахчавых займаюцца дзве гаспадаркі ў рэгіёне. На палях пад Смалявічамі сёлета сабраць плануюць пад 700 тон ураджаю. Сярэдняя вага аднаго кавуна тут 6-8 кілаграмаў. Першы ўраджай ужо рэалізавалі ва ўласных пунктах продажу. Апошнім часам вырошчваюць кавуны не толькі прафесійныя гаспадары, але і аматары на ўласных прысядзібных участках. Так, у Крупскім раёне Уладзімір Трусаў чатыры гады атрымлівае асалоду ад вырашчанага сваімі рукамі кавуна. Сюжэт Наталлі Кезік.
Паласаты ласунак на снеданне, абед і вячэру. У сям’і Трусавых на стале кавуны выключна ўласнага ўраджаю. Гаспадар ужо чатыры гады запар вырошчвае бахчавыя на сваім прысядзібным участку. Сцвярджае: культура не капрызная. А экалагічна чыстага пачастунку для ўнукаў хопіць да самай восені.
Ураджай кавуноў не штукамі, а тонамі падлічваюць у гаспадарцы пад Смалявічамі. Першы раз бахчавыя тут высадзілі восем гадоў таму. Сёлета ў гаспадарцы пад кавуны адвялі 5 гектараў. Першы ўраджай ужо сабралі - прыкладна 20 тон. Другі на падыходзе вагой пад 50 тон.
Кавун вось у такім выглядзе спецыялісты называюць шадрыкам. Каб вырасці да сапраўдных, вялікіх памераў, яму неабходна ўсяго два-тры тыдні. Для гэтага яму спатрэбяцца сонца і невялікая колькасць вільгаці. З-за вялікай колькасці ападкаў першы ўраджай у гаспадарцы аказаўся не вельмі ўдалым - некаторыя кавуны аказаліся пустацелымі. Зараз уся надзея на жнівеньскае сонечнае надвор’е. Калі не пахаладаюць ночы, то ураджай паласатых будзе сакавітым.
Сёлета на палях гаспадаркі з дзясятак сартоў кавуноў. А вырошчваюць ласунак двума спосабамі: на частцы плошчаў высяваюць насенне, для астатніх гектараў з вясны ў цяпліцах вырошчваюць рассаду. Герой гэтага сюжета Уладзімір Трусаў з насеннем пакуль не эксперыментуе, а вось вясной рассаду вырошчвае. І даглядае кожную ралінку, як маленькае дзіця.
У Мінскай вобласці пакуль толькі дзве гаспадаркі ў прамысловых маштабах спрабуюць вырошчваць беларускія кавуны - у Лагойскім і Смалявіцкім раёнах. Культура непераборлівая, і калі пашанцуе з устойлівым надвор’ем, то ўраджай гарантаваны. Эксперыментуюць гаспадары і на ўласных падвор’ях і вырошчваюць выдатны экзатычны ласунак.
Сакавіты ўраджай кавуноў збіраюць фермеры Мінскай вобласці
27 августа 2019