У Магілёве сталі вядомыя падрабязнасці трагедыі, якая здарылася напярэдадні. Следчы камітэт апублікаваў некаторыя матэрыялы расследавання. Па факце смерці дзіцяці пад даўгабудам, які абваліўся, узбуджана крымінальная справа. Затрыманы ўладальнік будынка. Усталявана, што гаспадар пабудовы - 42-гадовы жыхар абласнога цэнтра - самавольна пачаў узводзіць катэдж яшчэ ў 2008-ым, і пакінуў яго без кансервацыі. Уладзімір Каралёў вывучыў матэрыялы.
СК сёння агучыў падрабязнасці трагічнага інцыдэнту ў Магілёве. Па факце гібелі школьніка ўзбуджана крымінальная справа - за прычыненне смерці па неасцярожнасці. Зараз у ведамстве ўстанаўліваюць ступень вінаватасці падазроных і службовых асоб.
Двое школьнікаў прыйшлі ў госці да свайго сябра, які жыў па суседстве з недабудаваным домам. Хлопцы вырашылі пагуляць у закінутым будынку, хоць іх прыяцель папярэджваў аб небяспецы - хлопчыку туды забаранялі хадзіць бацькі. Але цікаўнасць узяла верх, і малодшага ніхто не стаў слухаць. Трагедыя адбылася ў той самы момант, калі сябры вылазілі праз аконны праём. Пліта перакрыцця абрынулася.
Юлія Ганчарова, афіцыйны прадстаўнік Следчага камітэта Беларусі: "Групай МНС з дапамогай выратавальнага абсталявання з-пад пліты дасталі дваіх малалетніх хлопчыкаў, навучэнцаў 4 класа. Пасля правядзення рэанімацыйных мерапрыемстваў канстатавана смерць аднаго з іх, другі з найцяжкімі траўмамі дастаўлены ва ўстанову аховы здароўя".
Да глыбокай ночы на месцы здарэння працавала следча-аператыўная група. Да раніцы ўрачы аперыравалі пацярпелага 9-гадовага школьніка - зараз ён у вельмі цяжкім нестабільным стане. Лепшыя нейрахірургі краіны змагаюцца за жыццё падлетка. І сёння следства заявіла, што затрыманы ўладальнік даўгабуду, дзе і адбылося абвальванне. Дом некалькі гадоў не знаходзіўся на кансервацыі і быў самабудам.
Юлія Ганчарова, афіцыйны прадстаўнік Следчага камітэта Беларусі: "Затрыманы жыхар Магілёва 1975 г.н., які на працягу 2008-2010 года на ўчастку без адпаведнага дазволу стаў самавольна будаваць дом. Следчымі прызначаны шэраг экспертных даследаванняў. Вывучаюцца прычыны і ўмовы, якія спрыяюць здзяйсненню дадзенага злачынства".
Следства падкрэслівае: мужчыну не вінавацяць у гібелі школьніка, але вызначаць ступень вінаватасці. За несанкцыянаванае будаўніцтва спытаюць і з чыноўнікаў.
Як паведамілі ў пракуратуры Магілёўскай вобласці, па выніках расследавання будзе дадзена прававая ацэнка і асобам, якія не забяспечылі кантроль за будаўніцтвам.
Прынята рашэнне мэтанакіравана, па ведамствах, па ўласніках правесці вось гэтыя праверкі, і тыя дамы, тыя будынкі, якія не закансерваваныя, якія руйнуюцца - знесці.
Праз некалькі гадзін пасля трагедыі ў Магілёве, у Полацкім раёне 6-гадовая дзяўчынка, якая гасцявала ў бабулі і дзядулі, патанула ў сажалцы, у двары дома. Некалькіх хвілін без увагі хапіла для трагедыі.
Следчыя заклікаюць бацькоў і блізкіх праяўляць больш увагі да дзяцей падчас школьных канікулаў. У іх зараз занадта шмат вольнага часу, і дзіцячая цікаўнасць не ведае меж.
