Сёння адкрылася вясновая сесія Палаты прадстаўнікоў
Улічваць рэаліі сённяшняга дня, якія складаюцца на сусветных рынках, распрацоўваючы сваё нацыянальнае заканадаўства, каб знізіць залежнасць беларускай эканомікі ад знешніх шокаў. Аб гэтым сёння гаварылі ў Авальнай зале на адкрыцці вясновай сесіі. Думаючы, вядома, на перспектыву. Бо дэпутаты прымаюць непасрэдны ўдзел у падрыхтоўцы двух важных дакументаў. Гэта праграма сацыяльна-эканамічнага развіцця на 5 гадоў наперад і праект бюджэту на будучы год.
Эканоміка і сацыяльная сфера ў прыярытэце дэпутацкай працы
Эканоміка і сацыяльная сфера - два галоўныя прыярытэты ў парламенцкай працы. Іх падсілкуюць прававой базай. Чатыры дзясяткі законаў ужо ў графіку. Яшчэ столькі ж амаль на падыходзе. Выразных арыенціраў чакаюць ад паслання Прэзідэнта. Па традыцыі ў гэтых сценах яно гучыць у красавіку. На гэтай сесіі дэпутаты зацвердзяць і дату выбараў Кіраўніка дзяржавы. Актыўная праца і ў пастаянных камісіях, яны ўжо гатовыя падлічваць прыбыткі і выдаткі галоўнага фінансавага дакумента 2021 года, хоць прымаць яго будуць толькі ўвосень.
Савет Рэспублікі за эфектыўныя і зразумелыя законы
Працуюць дэпутаты ў цесным звязку з калегамі-сенатарамі яшчэ на этапе абмеркаванняў усіх дапаўненняў у законы і кодэксы. Такі тандэм толькі на карысць, магчымасць паглядзець з розных бакоў на дзейснасць механізмаў у розных сферах, каб пасля прававая база праслужыла на гады наперад.
Візавае пагадненне з ЕС падтрымаў беларускі парламент
У першы рабочы дзень дэпутаты падтрымалі пагадненне з Еўрасаюзам аб спрашчэнні выдачы віз. Шэнген можна будзе атрымаць за 10 дзён. І кошт яго знізіцца для беларусаў да 35 еўра. Столькі ж будзе каштаваць і беларуская віза для грамадзян Еўрасаюза.
Пагадненне ў першы дзень сесіі падтрымалі і сенатары. Наступны крок - падпісанне Прэзідэнтам. Пасля чакаем адабрэння ад Еўрапейскага парламента і Савета ЕС. Так што, ужо ў сярэдзіне года новыя правілы могуць запрацаваць.
