Сімвалічная акцыя, прысвечаная будучаму юбілею Вялікай Перамогі, стартавала сёння ў беларускай сталіцы. Літаральна некалькі гадзін таму з Мінска ў Гомель прыбыў цягнік "Кветкі Вялікай Перамогі". Складаецца ён з сямі вагонаў. Гэтая лічба сімвалічная. Менавіта столькі дзесяцігоддзяў мы жывём пад мірным небам. Незвычайны цягнік - ідэя Беларускага саюза моладзі. У дарозе ён прабудзе некалькі тыдняў і наведае больш чым дзесяць гарадоў.
Ігар Завалей, першы сакратар Гомельскага абласнога камітэта ГА БРСМ: "Нездарма першы прыпынак - гэта Гомель. Бо менавіта з Гомельшчыны пачалося вызваленне Беларусі. Таму нам выпаў гонар прыняць гэты цягнік. У складзе цягніка будзе музей, які наведаюць амаль 500-700 маладых людзей за той час, пакуль ён будзе тут стаяць".
Аляксей Фіманаў, ветэран Вялікай Айчыннай вайны: "Слава тым, хто зрабіў гэтую выдатную акцыю. Усё ж не забываюць удзельнікаў вайны, не забываюць вайну. А вайна была страшная для нашага народа і дай бог, каб яна ніколі не паўтарылася".
Чыгуначны вакзал у Гомелі на некалькі гадзін ператварыўся ў вакзал ваеннага часу. Моладзь арганізавала тэатралізаваны паказ у духу тых гадоў. Гучала музыка, развяваліся чырвоныя пераможныя сцягі. Заўтра састаў прыбудзе ў Магілёў, а 5 мая эшалон вернецца ў Мінск.
Вось так па-вясноваму ў сталіцы сёння дзяўчаты Саюза моладзі закружылі ў танцы тых, дзякуючы каму мы ўжо 70 гадоў жывём у міры. Фактычна з урачыстага канцэрта на прывакзальнай плошчы і пачалася абсалютна новая акцыя самага маладзёжнага аб'яднання краіны - "Агітпоезд. Кветкі Вялікай Перамогі".
Ужо літаральна праз паўгадзіны на платформе №1 разгарнуўся сапраўдны тэатралізаваны паказ. Медсёстры аказваюць дапамогу параненым, убаку адпачываюць салдаты, а дзяўчаты развітваюцца з блізкімі. Усё гэта для таго, каб нагадаць і не забыць хвіліны, якія сёння для многіх - сямідзесяцігадовае мінулае, а для самых галоўных герояў гэтага свята - ветэранаў - частка жыцця.
Але па сутнасці гэты толькі самы пачатак шляху. Усе чакаюць святочны састаў. І ў гэтым таксама сімвал. Менавіта цягнікі ў гады вайны з сумам і надзеяй праводзілі на фронт і з вялікай радасцю сустракалі.
Сем вагонаў - па адным на кожнае дзесяцігоддзе нашай Перамогі. Над дызайнам цягніка працавалі. І зараз рэдкія экспанаты ўбачаць практычна ва ўсіх гарадах нашай краіны, бо цягнік ужо адправіўся ў дарогу.
У гэтым вагоне замест звыклых для пасажыраў сядзенняў стэлажы з экспанатамі: асабістыя рэчы байцоў, зброя і газеты тых часоў. Вось гэты шынель радавога салдата, які ў 1941-м абараняў Брэсцкую крэпасць.
Каб убачыць музей на колах, у Бабруйску ўтварылася сапраўдная чарга. Самыя цікаўныя наведвальнікі, вядома ж, дзеці.
Сустрэча незвычайнага цягніка менавіта тут для ветэранаў таксама сімвал. Гавораць: самыя жорсткія баі за Бабруйск адбываліся менавіта ў раёне вакзала. І тут жа сёння замест рову сірэн і бамбёжкі не менш гучна - іграюць песні ваенных гадоў.
Гомель сустрэў агітпоезд гэтак жа, як у дзень свайго вызвалення сустракаў салдат Чырвонай арміі. У вокнах будынка вакзала нават вокны заклееныя гэтак жа, як 70 гадоў таму.
Літаральна праз гадзіну ўжо на Алеі Герояў кожнага загінуўшага ў той страшнай вайне некалькі тысяч юнакоў і дзяўчат успамінаюць хвілінай маўчання. Словы падзякі і, вядома ж, кветкі да абеліска.
А пасля - канцэрт у шпіталі для ветэранаў Вялікай Айчыннай. Для тых, хто тую вайну вывучаў не па падручніках і кніжках. І ім таксама не забыліся падзякаваць. Як не забудуць і ветэранаў у Жлобіне і Магілёве - туды цягнік адправіцца ўжо заўтра. Дарэчы, такі маршрут зусім невыпадковы. Менавіта ў гэтай паслядоўнасці, наступаючы з усходу, нашы дзяды і прадзеды вызвалялі ад нямецка-фашысцкіх захопнікаў нашу краіну.
