Нямецкі аўтамабіліст усталяваў новы сусветны рэкорд, пакарыўшы адлегласць ад Магадана да Лісабона. Гэты транс’еўразійскі рэкорд не адзіны ў кар'еры гоншчыка. Былі яшчэ падарожжы і тры перамогі. Пасля кожнай чэмпіён выбірае адну з краін, праз якую пралягае яго маршрут, сустракаецца з выхаванцамі дзіцячых SOS-вёсак і пералічвае на іх рахунак грошы. Гэтым разам адзін з самых працяглых прыпынкаў аўтамабіліст зрабіў у Беларусі. З чэмпіёнам сустрэлася Таццяна Кароль.
Гэты шлях - ад Магадана да Лісабона - ён праехаў, усталяваўшы сусветны рэкорд. Нямецкі аўтагоншчык Райнер Цытлоу і яго каманда пакарылі адлегласць у 15 тысяч кіламетраў за 6 дзён і 9 гадзін. Усяго праехалі 7 краін, сярод іх і Беларусь.
Райнер Цытлоу, сусветны рэкардсмен-падарожнік: "Скажу адразу - зараз я фанат вашай краіны. Беларусь можна назваць такім схаваным чэмпіёнам з вялікімі магчымасцямі. Тут вельмі дружалюбныя людзі і дзіўная прырода. Тут сапраўды можна спакойна правесці водпуск".
І водпуск аўтамабілісту ў найбліжэйшы час ужо сапраўды спатрэбіцца. Бо за час паездкі Райнер Цытлоу спаў усяго па 15 хвілін за суткі. Гаворыць, на бяспеку руху гэта зусім не паўплывала - выкарыстоўваў спецыяльную методыку глыбокага сну. Яна замяняе 5-6 гадзін традыцыйнага адпачынку. Яшчэ адзін стымул для такой экстрэмальнай паездкі - дабрачыннасць.
Частку свайго чэмпіёнскага ганарару гоншчык гэтым разам пералічыў тым, хто загранічную экзотыку бачыў хіба што на малюнках у кніжках.
Усе атрыманыя сродкі ад рэкламы, а гэта 3 тысячы еўра, рэкардсмен перавёў на рахунак вось гэтай дзіцячай вёскі ў Мар’інай Горцы. Тут зараз жыве 71 дзіця, па сутнасці, гэта 12 сем'яў. І дапамагаць такім дзецям, якія засталіся без бацькоў, для чэмпіёна ўжо стала традыцыяй.
Галоўная мэта такой SOS-вёскі - стварыць атмасферу сапраўднай сям'і. У кожным доме тут жыве па 7-8 дзяцей, выхавальнік - разам з імі, але гэтага слова тут не чуваць наогул, усе без выключэння называюць яе мамай. Як і ў традыцыйнай сям'і, дзеці, вядома, вучацца, ходзяць у гурткі. Адзін з самых папулярных - каратэ. Не выключана, што пасля сустрэчы з легендарным гоншчыкам у самых маленькіх прыхільнікаў усходняга адзінаборства з'явяцца новыя кімано.
Дзмітрый Калтовіч, дырэктар SOS-дзіцячай вёскі ў Мар’інай Горцы:
"Гэтыя грошы пойдуць на агульнае фінансаванне SOS-дзіцячых вёсак, цалкам магчыма, на спартыўнае абсталяванне, абсталяванне для дзяцей, якія займаюцца каратэ-до".
А пакуль выхаванцы сямейнага дома ўспамінаюць сустрэчу з чэмпіёнам. А хлапчукі прызнаюцца, у марах паўтарыць, а тое і палепшыць рэкорд гоншчыка, каб беларускія імёны аўтапрафесіяналаў загучалі на ўвесь свет.